Basta daño material den accident di cadena riba Green Corridor

ORANJESTAD (AAN): Diahuebs mainta den carded di 10'or a sosode un boksmento di cadena riba Green Corridor, na altura di Sero Tijshi. 

Mesora trafico a stagna y polis y ambulance tabata na caminda.

   Polis cu a yega a bin topa un total di 5 envolvi. E boksmento tabata basta duro, unda cu un auto MG modelo MG3 hatchback color blanco no a regla velocidad na tempo, y a dal drenta patras di un flatbed Hyundai Porter color blanco, lantando esaki.

   E Hyundai Porter Flatbed na su turno a dal tras di un Nissan Tiida color shinishi.

   Un taxi Ford Escape color cora a bay dal tras di e MG MG3, y patras di e Taxi por a mira un Toyota Hilux Double-Cab Pickup tambe cu a dal.  Pues un total di 3 vehiculo y 2 auto.

   Dos ambulance a presenta na e lugar y por a mira Paramediconan transportando un señora pa ambulance. E señora tabata mustra ok, pero a wordo hiba pa Servicio di Emergencia na Hospitaal pa control di posibel whiplash.

  Posiblemente debi di no mantene distancia a causa e boksmento di cadena aki.  Corda cu semper ora bo ta coriendo riba Green Corridor, of tambe riba WVB Boulevard, pa semper core minimo 2 seconde tras di e auto bo dilanti.  Si acaso awa ta yobe, bo tin di core 4 seconde su tras.  Con ta calcula esey?  Check ora cu e auto bo dilanti a pasa na un palo di luz, y conta cuanto seconde ta dura pa abo tambe yega e palo di luz ey.  Asina bo ta calcula ta cuanto seconde bo ta coriendo su tras.

   Na Aruba ta duna les di rijbewijs indicando cu bo tin di laga espacio dilanti bo pa un “otro auto cu ta bezig ta inhaal por drenta bo dilanti”.  Esey tambe ta bon tip.