Barco di Norwegian Cruiseline a dal un iceberg na Alaska

ORANJESTAD (AAN): E potret aki saca na Aruba na April 2021, ta di e barco Norwegian Sun cu tin capacidad di transporta 2.400 pasahero.

  Den fin di siman, e barco aki a dal den un Iceberg net dilanti costa di Alaska.  Esaki a pone cu e compania a dicidi di cancela e viahe di 9-anochi aki.

   E compania a divulga cu ningun hende a resulta herida, y cu tur personal y tripulante a yega safe na puerto di Alaska.  E resto di viahe a wordo cancela, y e barco a regresa Diahuebs mainta na Seattle (Washington) na Merca.

   E barco Norwegian Sun tabata moviendo for di Hubbard Glacier na Alaska, ora cu e barco a dal pida grandi di ijs cu tabata drief.  E ijs tabatin menos di 1 meter cu ta aparece riba superficie, y tin menos di 2 meter di hanchura.

   Despues di e impacto, e barco a cambia di rumbo y a bay mara na waf di Juneau, na Alaska pa asina haci un revision.  Aki e compania a mira e seriedad, y a dicidi pa reduci e largura di e viahe, y tambe demas futuro viahe cu e crusero aki.

   US Coast Guard y demas oficialnan maritimo, a duna OK pa e barco regresa Seattle, pero tin di haci esaki na un velocidad mas abao.  Na Seattle tur e pasaheronan lo baha, manera tabata e plan original.

   Un vocero di e Crusero, a bisa cu e barco tabata pasando net e ora ey den un neblina diki, cu a limita visibilidad y pesey e barco a dal e Iceberg aki.

   Si acaso abo tin planea di subi e barco aki durante lunanan venidero pa un Alaskan Cruise, ta recomendable pa bo check cu bo agencia di viahe prome bo subi avion.