Banco di Caribe ta un di e sponsornan di e di 2 Festival Bos Escolar 2021

ORANJESTAD: E di dos edicion di festival di canto, Festival Bos Escolar  a tuma lugar na Cas Di Cultura. Banco di Caribe a haci entrega di premio na ganadornan di categoria 2.

E festival organiza pa fundacion Muchanan Sabi y Harmonix, e aña aki a conta cu 70 participante. Banco di Caribe ta masha orguyoso di por a patrocina e festival di canto pa di dos aña consecutivo. Nos ta considera e festival aki importante den formacion artistico di e mucha y hoben arubano.

   Tocante Muchanan Sabi y Harmonix:  Muchanan Sabi ta un grupo di mucha entre 3 te cu 12 aña y Harmonix ta un grupo di hoben di 13 aña p’ariba cu ta practica canto y baile den siman. E gruponan aki ta bou di direccion di Señora Edselyn Figaroa.

   E meta di e gruponan ta pa atraves di musica inspira nos muchanan pa nan crece cu confianza propio, respet, disciplina y cu amor pa arte. Atraves di musica ta inculca cultura di Aruba for di un edad hoben den e muchanan.

   Muchanan por a participa den 4 categoria. Categoria 1 tabata pa muchanan di 4 pa 6 aña, categoria 2 pa muchanan di 7 pa 9 aña, categoria 3 pa muchanan di 10 pa 12 aña y categoria 4 pa muchanan di 13 pa 18 aña . Pa cada categoria a saca prome, segundo y tercer lugar. Banco di Caribe ta felicita tur e ganadornan di Festival Bos Escolar, principalmente esunnan den categoria 2.