Baby di Aña 2026 a bira Abizeily Werleman

El a nace pa exactamente 1:20 am

ORANJESTAD (AAN): Ta hopi hende tabata wardando cu atencion pa haya sa kende lo bira Baby di Aña 2026.

   No mester a warda hopi, pasobra apenas 80 minuut despues di tiro, ya e Baby di Aña di 2026 a nace.  Y el a ricibi e nomber bunita Abizeily.

   Babygirl aki a nace pa exactamente 1:20 am na verloskamer di Dr. Horacio Oduber Hospital (HOH). Un rato despues pa 1:23 am, otro baby muha muhe a nace, pues un momento di hopi alegria pa Aruba y team di HOH cu e bendicion aki.

   Ta un tradicion cu Aruba ta pendiente manera semper pa sa ken ta bira e baby di aña y pa 2026 e ta resulta un baby mucha muhe mescos aña pasa. For di momento cu 12’or di anochi a bati, tur personal di departamento di Maternidad tabata pendiente yegada di e prome baby y hopi contento nan a bira ora no un pero dos baby a nace casi tras di otro.

   Cu alegria y orguyo, mami Shaneyda Werleman a carga su baby Abizeily.

   A compronde cu Baby Abizeily a nace un parto natural, y ta Shaneyda su di tres yiu muhe. Abizeily su rumannan tin 10 aña y 6 aña. Tata Abraham Maduro tambe ta super contento pero mester a traha e dia di Aña Nobo, y no a logra yega pa un potret. E parto a bay lihe, sin ningun problema y tabata encarga pa partera Quandt. Baby Abizeily ta pisa 3740 gram y tin un largura di 50.5 cm.

   Mami y papi ta super feliz cu nan baby Abizeily ta saludabel y ta gradici partera Quandt, enfermeranan Traemaine, Thirza, Jennifer, Melizienne y henter e team di maternidad pa e guia  durante henter e proceso prome y despues di e nacemento.

   Team di HOH tabata presente hunto cu sr. Jacco Vroegop, presidente di Hunta di Directiva di HOH unda el a felicita mami Shaneyda cu baby di aña 2026, esta Abizeily.

   Tambe a pasa un rato cerca e di dos baby di aña esta Skailyh-ann di mama Lukania van Leenen y tata Darlin Montero cu a nace via di un operacion di emergencia. E baby girl ta saludabel y tur cos a bay bon.

   Gradicimento ta bay na e diferente donacionnan haci na e baby di aña 2026 di Compra Trading y Swift Distribution Aruba.

   Team di HOH ta felicita famia y Aruba henter cu baby di aña 2026 y alavez ta desea un y tur un feliz y saludabel 2026 y claro tambe hunto ta bisa Salud na bo Salud.