AZV ta un “Rolls-Royce” cu ta costa 250 miyon cu Aruba no tin placa pa carg’e

Minister Presidente den Staten tocante AZV: --- ORANJESTAD (AAN) – Minister Presidente, mr. Evelyn Wever-Croes, a presenta na Parlamento, pa contesta diferente pregunta cu a wordo haci pa varios Parlamentario, y e reunion mes a wordo pidi pa e lider di MAS, Marisol Lopez-Tromp.

Prome Minister a acentua cu e hecho cu parlamentario Lopez-Tromp no tabata tey, ta algo hopi remarcable.

Otro parlamentario cu a haci pregunta ta Mike Eman, di fraccion di AVP, cu tampoco tabata presente. No obstante, e mandatario a bisa cu e ta bay toch na e esencia di locual gobierno kier haci, pasobra nan ta kere den gobernacion y tambe den Parlamento. E tema ta AZV . Minister Presidente a puntra: “Nos ta para na un cruzada crucial pa cu AZV. Nos mester dicidi si nos kier sigui cu AZV of nos ta laga AZV kibra. Y si nos kier sigui cu AZV, nos mester di lidernan cu ta dispuesto pa carga nan responsabilidad, y tuma e mihor decisionnan den bienestar di nos pais”, ta palabranan cu Prome Minister a expresa. Minister Presidente a bisa cu Covid-19 a haci un impacto na Aruba cu nunca ningun hende tabata kier ni desea. “Ohala berdad nos lo tabata por delete, erase, locual cu a pasa. Y tin hende cu ta haci manera cu Covid no ta existi”, el a expresa.

E dignatario a puntra Presidente di Staten si e ta kere cu señor Mike Eman por a goberna e pais aki den un pandemia? “Y si e lo tabata tin e curashi di enfrenta tur e retonan cu a bin riba e pais chikito, pero cu un curazon grandi, aki? Of si por goberna e pais aki den un periodo post-covid caminda un reto tras di otro ta bin riba bo?”

“Y pa cual e pais ta spera di tin gobernantenan serio, cu curashi y cu determinacion pa tuma e decisionnan necesario, pa hiba e pais aki padilanti” e mandatario a expresa y a agrega cu si pa hopi menos señor Eman a bay den welga di hamber, e ta kere cu e contesta ta NO. “No tin espacio mas. E politica di AVP y e politica di Mike Eman, den e Aruba aki saliendo di Covid y Aruba post Covid” e dignatario a trece dilanti. El a subraya cu Aruba tin un gobierno cu no ta core pa su responsabilidad. El a bisa cu gobierno tin un minister di salubridad cu no ta un docter, y pa hopi tempo esey ta e caso. “Esey kiermen cu e por sirbi interes di gobierno, e por sirbi interes di e sector di salud, y e por sirbi interes di pueblo, y eynan ta e balansa cu nos mester aworaki”, Prome Minister a subraya. El a señala cu kizas na otro momento e ta diferente, pero aworaki esey ta loke Aruba tin mester.

“Y awo tur atencion ta riba AZV y rescata e fondo di AZV. E pregunta cu nos tin cu haci nos mes, mi a hacie awe varios biaha, y mi ta spera cu e keda resona cerca tur esnan cu ta scuchando. Kico nos pa AZV, den e futuro generacion. Nos kier pa e sigui? Si e contesta ta si, e siguiente pregunta ta: nos ta dispuesto pa carga e responsabilidad pa e sigui? Nos a papia di un Rolls-Royce, cu lo costa 250 miyon na e siguiente diez añanan. Nos no tin e placa aki! Y nos no por carg'e! No tin ni un formula cu nos por carga e 250 miyon extra aki otro aña. Kiermen, si nos dicidi cu nos kier sigui cune, nos tin cu tuma e decision si nos kier sigui cu e rolls Royce te ora e para na caminda y nos ta keda na pia, of nos ta cambia e modelo; un modelo mas largo, mas sostenible y mas affordable cu por sigui pa hopi mas tempo y cu por yuda hopi mas hende”, e dignatario a remarca.