Awe sentencia ta cay pa homber cu a secuestra, viola y maltrata su señora brutalmente

ORANJESTAD (AAN): Awe Diabierna mainta Hues di Corte di Husticia ta dicta sentencia pa e homber B., kende ta wordo acusa cu riba 11 Augustus 2025 a secuestra, viola y maltrata severo su señora V.

   Tratamento di e caso a tuma lugar dia 9 di Januari 2026, caminda Hues a puntra B. kico e ta pensa di e acusacionnan. B. a bisa cu e tempo ey e tabata bao influencia di droga y tabata un otro persona. El a bisa Hues cu e ta para pa loke el a haci. El a admiti di a maltrata e dama V. El a bisa Hues cu su wowo a bira scur y e no ta corda kico a pasa exactamente. Hues a mustra cu B. durante interogacion na Polis dia 11 Augustus 2025, e no a menciona cu e no ta corda. Hues a bisa cu e dama V. a bisa Polis cu B. a maltrat’e cu su cellular den man. B. a reacciona cu nan tin 20 aña casa y cu e no ta bay viola su señora V.

   Potret hororoso di maltrato: Hues den Corte a mustra B. potret con V. a keda interna den hospital. Por a mira e dama V. cu su banda di cara robez tur hincha. B. su reaccion tabata, cu el a baha cabez y despues a bisa cu e no por kere cu el a haci e cos ey.

   Hues a sigui bisa cu e dama V. a bisa Polis, cu na e cas, B. a forza V. tene relacion sexual cun’e. Ta asina cu nan ta separa y V. tabata biba un otro caminda. B. a reacciona cu si V. no tabata kier tin relacion sexual, e por a bisa. Hues a mustra cu segun V. su declaracion, B. a bay su cas y lock e porta y forza V. tin relacion sexual cun’e. Segun V., e no tabata kier tin relacion sexual pero B. tabata insisti. Despues B. tabata kier pa V. habri su cellular pa e wak aden. Na dado momento B. tabata dal V. cu e cellular na su cara.

1. a bisa Hues cu den KIA el a busca Dios y el a arepenti y ta para pa loke el a haci. Fiscal a remarca cu B. ta bisa cu el a arepenti y entrega na Dios pero den Corte e no ta bisa tur cos!

   Fiscal a baha pisa: Fiscal a bisa cu dia 11 Augustus 2025, B. a bay te na trabao di V., gar’e, lastr’e ariba caminda, hink’e den auto. Na e cas di B., V. a wordo viola y maltrata. Fiscal ta haya cu e maltrato ta severo y potret ta mustra esey bon cla. Fiscal a mustra cu V. mester a keda 5 dia interna den hospital pa hemoragia celebral, door cu B. a dal V. cu forza diferente biaha na cara. Fiscal ta haya cu B. a tacha e integridad di V. kende a keda afecta y awor ta wardando pa haya tratamento di psycologo. Nan yiunan tambe a keda afecta.

   Fiscal a exigi 7 aña di prison pa B., kitando e tempo cu B. ta sera. El a bisa cu el a tene cuenta cu peticion di V., pa B. haya tratamento pa su adiccion. Fiscal ta kere cu ora yega e momento di libertad condicional, lo bay haci pa B. rehabilita. Pa loke ta e demanda di daño di 15 mil Florin di e dama V., Fiscal a mustra cu ainda V. mester haya tratamento. El a pidi Hues pa aproba e demanda di daño y pa pone e medida di pago. Tambe el a pidi Hues pa aproba e demanda di 300 Florin pa e cellular di V. cu B. a kibra.

   Awe mainta Hues ta dicta sentencia y DIARIO lo informa kico ta e decision di Hues.