Awe nos ta drenta den Cuaresma, un tempo di renovacion spiritual

Pader Jose Miguel Nava:

ORANJESTAD (AAN) Pader Jose Miguel Nava, di Instituto Kateketico Diosesano Aruba (IKDA), a elabora tocante Diaranzon di Shinishi, cu cual ta drenta den e temporada di Cuaresma.

   Pader Nava a expresa cu pa por wak e importancia di Cuaresma nos mester sa kico e ta y pakico e ta sirbi.

“Cuaresma ta un tempo di renovacion spiritual, manera e Pueblo di Israel a cana 40 aña den desierto, y Hesus a cana 40 dia den Desierto, asina tambe e Iglesia. E pueblo Cristian ta yama pa prepara su mes, pa cana den e desierto di nos bida, pa biba y celebra e Pasco grandi di Resureccion”, Pader Nava a señala.

El a agrega cu na Aruba tin hopi celebracion cu fiesta bunita y colornan, pa e fiesta di Pasco di Nacemento. “Pero e temporada bunita ey no tin sentido, sin e temporada di Resureccion. Esey ta importante, pasobra si nos kier muri y resucita hunto cu Cristo, nos mester prepara nos mes. Nos mester reconoce nos debilidadnan, nos faltanan, nos mester examina nos mes, nos manera di biba como hende, y tambe como miembro di nos famia, di nos sociedad, wak cual ta nos comportacion, nos foutnan, y pa cuminza biba un bida nobo den Cristo Hesus”, Pader Jose Miguel Nava a señala. 

   El a subraya cu esaki ta e temporada di Cuaresma cu nos ta bay drenta, cu ta un yamada profundo cu Dios ta haci nos, pa un renovacion spiritual, un renovacion integral, no so den rezamento, den oracion, sino tambe den nos bida cu otro pero tambe den nos bida cu nos mes.