Awe na Biblioteca Gibi Basilio ta lansa su obra “Fierno Celestial” pa pueblo di Aruba

Mirto Lacle, Gestor Cultural, ta invita comunidad:

ORANJESTAD (AAN): Señor Mirto Lacle, Gestor Cultural, den entrevista cu DIARIO, a menciona cu Luna di April ta un luna di hopi celebracion cultural.

Dia 2, por ehemplo, a observa e Premio Nobel di Mucha, dia 23 lo celebra dia di autor, y dia 29 ta celebra Dia Internacional di Baile.

El a bisa cu aki por papia di un triologia y den e concepto aki e kier invita pueblo di Aruba, cordialmente, den nomber di BNA, Departamento di Cultura, y su persona, pa bin awe na Biblioteca Nacional Aruba, di 6’or di atardi pa 8’or y mey di anochi, pa un actividad den cual tin señor Gibi Basilio di Curacao y su banda “Palabra Musical”.

“Gibi a caba di lanza su tombo di poesia ‘Fierno Celestial’ cu el a presenta caba na Curacao y Bonaire, y awo ta toca Aruba. E ta bay haci un show, e lo declama. Nos conoce Gibi como actor, cantor, productor, y docente, y asina cu su banda ‘Palabra Musical’ e lo bin trece e poesia aki pa nos”, Lacle a reitera.

Lacle a indica cu entrada ta gratis y e ta bolbe invita pueblo di Aruba pa bin BNA pa presencia e lansamento di “Fierno Celestial” cu ta e obra nobo di Gibi.

Mirto Lacle a agrega cu Gibi ta conoci den e “Canta Cuero” cu ta otro buki di dje, den cual e ta expresa kico nos sernan di Caribe ta. “Nos ta Caribeño, nos ta Europeo? E dia aki e lo bisa esaki tambe. E ta bin acompaña di tres musico, y e musiconan aki mi ta sigur cu lo haci un bon presentacion”, Mirto Lacle a expresa.