AVP a gana Eleccion cu 17.876 voto

Resultado di votamento

ORANJESTAD (AAN): A dura Diasabra te 5:05 am, pa porfin Stemlokaal 5 a duna Aruba resultado di votamento na St. Aloysius School.  Pues a dura 10 ora pa a keda cla eynan.

   Esaki a duna e ora e resultado final preliminar di Eleccion 2024 y por a confirma e  resultadonan di acuerdo cu e cifranan despues di a conta e votonan di e 72 urnanan electoral.

   E resultadonan di voto total pa partido ta indica lo siguiente:

AVP: 17.876 voto.

MEP: 17.572 voto.

FUTURO: 7.349 voto.

PPA: 3.538 voto.

RAIZ: 2.323 voto.

ACC21: 2.204 voto.

MAS: 1.722 voto.

LpR: 1.349 voto.

RED: 635 voto.

HTC: 505 voto.

CURPA: 423 voto.

   E biaha aki tabatin un total di 55.496 voto valido y un total di 926 voto invalido.  En total 13.352 persona a keda sin bay vota, y esey ta algo preocupante.

   Pues por mira cu AVP a gana eleccion, door di haya 304 voto mas cu MEP.  E reparticion di asiento ta bay di e siguiente manera:

AVP: 6+3 restzetels.

MEP: 6+2 restzetels.

FUTURO: 2+1 restzetels.

PPA: 1 asiento

   Riba e imagen aki por mira cu Partido AVP a domina den stemlokaalnan na Oranjestad y tambe stemlokaalnan di San Nicolas.

   MEP a domina na stemlokaalnan di Noord, Paradera, y Santa Cruz (incluyendo Pos Chiquito), y Savaneta.

   Tardanza na Stemlokaal 5: E tardanza di conteo na e stemlokaal conoci como St. Aloysiusschool (1) tabata manera algo sin precedente.  Siendo cu di antemano por a tende Hoofdstembureau bisa cu nan ta hopi optimista cu ya pa 12:30 am cu tur resultado lo ta conoci... esey no a bira realidad.

   A keda warda riba 3 stemlokaal... y na final a djis keda warda riba esun di Noord so.  Y ta di compronde tambe, pasobra no ta djis e votador scuchando Radio of mirando TV ta cansa... e trahadornan di e stemlokaal tambe naturalmente ta sinti di e cansancio.  Cada biaha cu ta haci reconteo, e wowonan ta bira mas cansa, curpa ta cansa.  Y pa colmo na e Stemlokaal aki so, tabatin 50 voto invalido.  No ta conoci si acaso e votonan invalido ey a pone cu e conteo a stagna na St. Aloysiusschool.

   Dado momento despues di 3:00 am, hasta personal di Hoofdstembureau a acudi eynan.  Poco despues un di e miembronan di e Comision di Stemlokaal a bira malo, y hasta Ambulance a core yama.

   Riba social media por a nota cu pueblo a keda nada impresiona cu e tardanza aki.  Con duro por ta pa bo conta menos di 800 voto y dura 10 ora largo?  Un ciudadano a hasta haci suplica, pa Hoofdstembureau “kita e nomber di trahadornan di e comision eynan di Stemlokaal 5, y no laga nan participa na ningun eleccion den futuro”.

   Finalmente te 5:05 am, e resultado final a wordo duna, y e ora por a confirma cu enberdad AVP a gana eleccion cu 17.876 voto.  Riba e grafico aki por mira con e resultado di Stemlokaal 5 a keda.

   Voto electronico por a yuda: Den pasado por a corda con president anterior di Hoofdstembureau, esta Glenn Thodé a purba di introduci voto electronico pa eleccion na Aruba.  Pasobra cu e sistema ey, kizas ya caba pa 10:00 pm ta tur hende lo a haya sa caba con e votonan a keda cla.  Ya pa 11:00 pm tur hende lo por a haya e lista individual di candidatonan.  E lo yuda evita cu hendenan ta haci voto invalido tambe.

   Pero na 2021 esaki a wordo rechaza, y na final a sigui cu e sistema anticua di voto... y pesey mester a keda lanta te 5:05 am pa mira e resultado final.

   Resultado individual: E biaha aki, di antemano Hoofdstembureau a indica cu e trahamento di lista individual lo bay dura un poco.  E ta un trabao cu a ser haci tanto Diasabra como Diadomingo.  Ta pensa cu sea Diamars of Diaranson e lo sali.

   Sinembargo toch tin chens cu e resultadonan individual lo worde publica awe Dialuna, segun DIARIO a compronde.  Esey ta depende si acaso no a topa contratiempo.