Automobilistanan lo ricibi nan plachinan di number den e proximo dianan

Minister Geoffrey Wever:

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, ta anuncia cu automobilista- y motociclistanan lo ricibi nan plachinan di number nobo den e proximo dianan.

   Minister Wever, den cooperacion estrecho cu Departamento di Impuesto, ta finalisando e proceso di compra di e plachinan y otro siman e departamento lo ta cla pa sigui brinda servicio na e personanan cu ta wardando pa registra nan auto, truck of brommer y otorga e plachinan di number nobo. E prome grupo cu lo ricibi nan plachinan ta esnan cu ta registra pa e categoria MFA, DT, T y O. Despues lo sigui e grupo di categoria A y V.

   Ta importante pa splica cu normalmente Departamento di Impuesto ta ordo suficiente plachi di number pa cubri e cantidad necesario pa tur vehiculo. Pa cu esaki e departamento ta tene cuenta  tambe cu un cantidad di number adicional como reserva. Sinembargo, desde september 2025 e demanda pa number a aumenta drasticamente, locual a causa cu e cantidad di reserva di plachinan di categoria A, MFA, DT y O a caba den corto tempo.

   Entre september y december 2025, e departamento a percura pa ordo 3.000 plachi extra y esakinan tambe a caba hopi lihe debi na e demanda constante pa registracion nobo di vehiculo.

   Awor, na januari 2026, Departamento di Impuesto a bolbe inicia e proceso pa cumpra mas plachi di number. Parti di e proceso ta encera tambe cu mester a formalisa e aumento di e serie di number di e diferente categorianan di plachi pa medio di un decreto ministerial. Mientrastanto Minister Wever a firma e decreto di forma cu e proceso di compra por a continua rapidamente. Ta trata aki di compra di 6.750 plach’i number.

   Departamento di Impuesto ta hayando bon cooperacion di e compania cu ta traha e plachinan, pa asina por ricibi y cuminsa otorga esakinan mas lihe posibel. Mientrastanto registracion di vehiculo no a stop pa e otro categorianan di plachi. Departamento di Impuesto ta continua cu registracion di vehiculonan cu no ta cay bou e categorianan A, MFA, DT y O. Pago di impuesto di vehiculo di motor tambe ta continua manera costumber.

   Minister Wever y Departamento di Impuesto tin comprension cu e tardansa pa otorga plach’i number ta causa frustracion y ta ofrece disculpa pa e situacion inconveniente aki y ta sigura nos automobilista- y motociclistanan, cu lo no dura largo mas pa nan ricibi nan plachinan di number.

   Minister Wever ta gradici e ekipo di Departamento di Impuesto y e compania cu ta traha e plachinan, pa e bon cooperacion y trabao cu nan ta eherciendo. Alavez minister Wever ta gradici e automobilista- y motociclistanan pa nan pasenshi y comprension.