Auto a dal peaton cu a dicidi na cruza Green Corridor

Caso cerca di Young Fellow

ORANJESTAD (AAN): Diahuebs mainta pasa di 11'or, Polis y Ambulance a bay cu urgencia riba Green Corridor net un tiki pariba di Rooi Barcadera, pa ta exacto algun meter pariba di Young Fellow Bar & Restaurant.

   E prome yamadanan ta indica cu eynan un auto a dal un peaton.  Como cu esaki ta un highway a pone cu autoridad a yega cu urgencia. 

   Mientrastanto rotonde Seri Tijshi a wordo cera, desviando trafico pa zuid pa evita cu trafico ta sigui bay pariba.

   E prome unidad di Polis cu a yega, a bin topa cu e peaton cu ta mustra di ta ok, pues ta djis levemente herida.  E auto cu a dal’e, a stop mas pariba pazuid di caminda.  Pero riba caminda por mira e lastro largo di brake, y tambe parti di un spiel kibra abao riba caminda.

   Segun chauffeur di e Hyundai Accent hatchback color shinishi cu number A-40658, el a mira e peaton masculino baha di Bus pazuid di caminda, y inespera a bay cruza e caminda di dos via pa bay panort.

   E Hyundai Accent color a topa cu e peaton ya ta mey-mey di e dos vianan, na e liña.  El a trata na desvia pa no dal e pero lamentablemente e spiel si a dal e cabayero.   Despues di esaki e auto a lastra brake baha pazuid di caminda.

    Rapid Responder y tambe un Ambulance tabata presente, y a opta pa bay cu e peaton toch pa Hospital.

Tur hende eybao ta convenci cu e peaton a scapa di haya golpi fuerte.  Polis y dos compania di roadservie tabata presente na e lugar.