Aumento di prijs di pan ta otro castigo pa pueblo di Gabinete AVP Futuro

Partido MEP:

ORANJESTAD (AAN): For di 1 di Januari 2026, pueblo Arubiano a topa cu un realidad duro: prijs di pan a subi hopi, sin advertencia y sin ningun splicacion pa hendenan. E lista di prijs nobo, cu ta circula bou di pueblo, ta mustra aumentonan significativo tanto na prijs por mayor como na retail. E noticia aki ta un bofta grandi pa pensionadonan y famianan cu poco entrada, cu ya tabata luchando pa yega fin di luna. 

Hopi pensionadonan a keda babuca ora nan a mira cu pan – un producto basico den cada cas – a bira mas caro di un dia pa otro. Hopi di nan ta bisa cu nan no a wordo informa di nada, ni via gobierno ni via instancianan oficial. Transparencia? Comunicacion? Tur esaki a keda falta. 

Claro cu esaki ta hustamente loke AVP FUTURO no kier pa pueblo mira. Pero aunke bo no ta mira e noticia, bo ta sinti si e golpi den bo cartera. Cada subida di prijs ta un castigo directo contra e hende comun, cu ta traha honesto y cu ta conta cada florin pa sobrebibi. 

Mientrastanto, ni un representante di gobierno AVP FUTURO kier splica dicon e prijs di pan a subi asina. Ningun explicacion, ningun responsabilidad, ningun empatia cu pueblo. E silencio ta mas duro cu e subida mes. 

Esaki ta e “regalo di Aña Nobo” cu AVP FUTURO a duna Aruba: mas presion financiero, mas inseguridad, y mas desconfianza den un gobierno cu mester ta para na banda di su pueblo. Pueblo Arubiano no ta pidi milagro, pero respet, claridad y accion si ta e minimo cu pueblo merece. 

Pan no ta un luho. Pan ta un necesidad. Y gobierno AVP FUTURO a lubida esaki. Nan a lubida pa ken nan mester ta gobernando.