ATA ta verifica si situacion Merca-Venezuela ta conduci na cancelacion di vuelo

Ronella Croes, director di ATA:

ORANJESTAD (AAN) Director di Aruba Tourism Authority, señora Ronella Croes, a reitera cu ora el a reuni cu e socionan di ATA, el a pidi un resumen pa wak si e situacion cu a surgi na entre Merca y Venezuela ta conduciendo na cancelacion di vuelo.

   Esaki ATA mester a verifica y esey nan ta haciendo, Croes a bolbe bisa, siguiendo riba e tema, den entrevista cu DIARIO. El a señala cu ATA no ta hacie solamente pa consumidor cu ta biaha pa Aruba for di diferente lugar di nos region, pero tambe pensando riba gruponan cu tin conferencianan cu nan a planea na Aruba, y negoshinan tambe ta hopi importante, y eynan tambe nan ta bay verifica. ATA ta anticipando tambe si gobierno, entre otro, lo desea di tin informacion, sigur tambe di Aruba Tourism Authority.

   Bon trabao di Aeropuerto: “Mi ta uni mi mes na e mensahenan cu mi a tende ayera di gradicimento na Director di Aeropuerto di Aruba, cu orguyo y gratitud, pa e manera con a dirigi’e, como un persona ta hopi di cerca y profundo den operacion. Enberdad, esey ta e caso, y Aruba a haci un bon trabao, y esey ta e trabao colectivo atrobe di aeropuerto, pero eyfo tambe di e taxistanan, operadornan di diferente medio di transporte, parti di turismo crusero, hotelnan, etc.” Ronella Croes a señala.

   Ronella Croes a bolbe señala cu tur ingrediente tey pa Aruba tin un temporada halto hopi positivo, cu hopi beneficio pa un y tur, y ban cuid’e.

   “Y cuid’e kiermen cu ora cu tin crisis, cu tin problemanan cu nos tur bin hunto, y nos tur ta duna di nos  parti, nos tur tin esey den nos, e ta wordo demostra cada bez, y atrobe, ban cuida esey!” Ronella a remarca.

   Concientizacion ta hopi importante: El a bisa cu no mester tin crisis pa nos cuida esey, pero nos ta kere cu e concientizacion ta hopi importante.

   “Bisando esey mi ta kere cu mi a haya un par di punto cu a bin dilanti repetitivamente si, pa nos duna atencion na nan, y nos ta haci’e, y nos ta bay wak cu otro partido con conhuntamente nos por bay haci mas na esaki. Ta topiconan manera limpieza, cu no ta respeta e hecho cu no por para un vehiculo riba santo blanco; cosnan asina ta  hopi, hopi importante pa nos, y nos mes a bin ta duna mas atencion na esaki na 2025.

   Na proteccion di naturaleza, cultura, educacion, hopi colaboracionnan cu nos tin a cera cu Colegio EPI, EPB, Go Cultura Foundation, CedeAruba, Aruba Conservation Foundation, Cas di Cultura, ta hopi proyecto grandi nos tin, y patras di cortina, hopi cos cu ta pasa di parti di ATA. Ey si, mi ta bisa cu, ban asegura cu e concientizacion di bo mesun papel di cuida e industria aki, ta presente, incluso na e momentonan ey.

   Esey ta hopi importante y nos tin hopi pa celebra, hopi pa gradici, hopi pa continua cu e mesun comportacion ey pero nos tin pa siña tambe. Nos tin e camindanan tambe unda mester wordo drecha y esey mester reconoce. Y bo por conta cu nos ta wak kico mas nos mester haci, pero no ta un responsabilidad di ATA so, tampoco”, Ronella Croes a resalta.