ATA ta e instancia cu ta monitor internacionalmente loke ta sali di Aruba

Ronella Croes, director, ta relata:

ORANJESTAD (AAN) -CEO di ATA, señora Ronella Croes, a indica den su entrevista cu DIARIO, cu for di basta luna caba, incluso cuminzando pa bay bek na Maart aña pasa, cu ATA a saca su prome documento, tempo cu a surgi e problema cu introduccion di tarifanan, cu lo a nifica un posible impacto pa turismo.

   “Nos a simula diferente escenario, pero desde e momento ey caba bo ta mira den un documento asina, diferente statements cu ATA a formula, y a comparti esaki cu sector publico y priva, p’asina tur hende, si nan wordo confronta cu pregunta y preocupacionnan, pa nan sa cu nan ta ekipa cu kico pa contesta.

E consistencia di e mensahe ey cu ta bay na nos bishitantenan, na prensa internacional, etc., ta hopi importante”, Ronella Croes a señala.

   El a agrega cu ATA ta contento cu Aruba a desaroya  hopi den maneho di crisis, y esey ta un di e papelnan di ATA tambe.

   “Pues, e statements ey, nos a bin ta ahusta, conforme cambio di situacion, nos tin statements separa, cu nos a provee tambe nos socionan pa loke ta trata e situacion na Venezuela, y segun e situacion ta desaroya, nos ta ahusta esakinan. Tin ora nos ta indica pa statements pa bo use na un manera reactivo, pues no bay mande proactivamente, pero si bo wordo puntra esey ta loke bo por contesta, na cada pregunta, etc.”, Ronella Croes a señala.

El subraya cu asina ATA ta maneha e diferente crisis, y esey ta e caso for di comienzo di aña pasa caba, unda cu nan a sigui ahusta basicamente e mensahe cu ta bay afo.

“Y banda di esey, ATA ta esun cu ta monitorea loke ta sali di Aruba internacionalmente. Pues, nos tin bon bista. Den fin di siman nos a haya dos punto fiho cada dia, mi ta haya un update completo, di kico ta e cobertura, den ki media el a sali, y kico ta e mension den ki indole ta papia di Aruba, y tur esaki ta mecanismonan cu ATA tin”, Ronella Croes, director di Aruba Tourism Authority a conclui.