Asina Aruba a ricibi Comisionado Europeo pa e gran Foro LGO-UE

ORANJESTAD (AAN): Den marco di The 21st Overseas Countries and Territories – European Union Forum,

Aruba a ricibi den fin di siman na Aeropuerto Internacional Reina Beatrix e Comisionado di OCT di Union Europeo, señor Jozef Síkela.

   Na su yegada, e Comisionado a wordo ricibi pa Prome Minister Mike Eman hunto cu Vice-Premier Gerlien Croes y Minister Plenipotenciario Mildred “Milly” Schwengle. E recepcion aki marca e inicio di un serie di encuentro y dialogo den contexto di e foro internacional cu Aruba ta anfitrion.

Eman a indica cu: “Pa Aruba, esaki ta un momento di honor. Nos ta ricibi liderazgo di Union Europeo y partnernan di OCT na nos isla.”

   E foro aki ta duna Aruba un oportunidad pa presenta no solamente nos vision, pero tambe e oportunidadnan concreto cu Union Europeo ta ofrece. Ta importante pa nos comunidad sa cu e oportunidadnan aki no ta limita pa gobierno so, pero pa sector priva y ciudadano tambe por beneficia di dje. Aruba tin un trayectoria fuerte cu proyecto financia pa Union Europeo, for di nos museo arqueologico te na nos Parke Nacional y iniciativa di sostenibilidad. Islanan chikito manera nos tin reto similar, pero tambe nos tin capacidad pa logra resultadonan grandi ora nos traha hunto. Esaki ta un momento importante pa fortalece cooperacion y posicion Aruba den un contexto internacional.

   Di su banda Minister Gerlien Croes a expresa cu: “Nos ta trahando activamente riba tema manera refineria, transporte, y maneho di desperdicio, cual ta topiconan cu tin impacto directo riba calidad di bida.”