Arubus a extende servicio di Bus pa area di Baby Beach

Pa motibo di demanda halto pa e ruta:

ORANJESTAD (AAN):   DIARIO a haya informacion cu directiva di Arubus a tuma un decision importante recientemente: extende e servicio di bus den area di San Nicolas te Sero Colorado, caminda Baby Beach ta localisa. Esaki ta nifica cu awor durante henter siman, busnan lo ta operando pa e area di Baby Beach.

            Tur cos ta indica cu tin un demanda halto pa loke ta transporta pa Baby Beach y esaki ta e motibo di e decision aki.

            Tur dia, e prome bus lo sali di e estacion di bus na San Nicolas na 10.40 di mainta, mientras cu e ultimo bus lo sali di mesun estacion na 4.40 di atardi. Entre e prome salida y e ultimo salida diario, lo tin un intervalo di 45 minuut pa cada bus.

            Na su debido tempo, Arubus lo ahusta e orario di salida di bus for di e estacion na San Nicolas pa Sero Colorado, basa riba e apertura di Secrets Baby Beach Aruba.

            Esaki sigur ta un tremendo decision mirando cu hopi trahado di e hotel lo tin mester di transporte. Por imagina cu tambe lo aumenta e demanda di esnan cu kier bay dal un keiro den e area pa asina aprecia e desaroyonan cu e apertura cu e hotel nobo lo trece cu ne.

            For di algun opinion di diferente persona por ripara cu nan ta desea di mira mas interes pa desaroyo comercial den e area di Sero Colorado. Esaki ta un zona masha bunita cu lo por trece mas bishitantenan.

            Por ehempel, ya cu tin varios condominium cu ta bay habri, por probecha e momento aki pa haci algun tienda, restaurant of lugar cu por atrae mas cliente. No solamente e habitantenan, pero tambe esnan interesa den pasa den e area y bebe un koffie, come un dushi cuminsa of te hasta cumpra algun souvenir.

            Ban spera cu poco poco San Nicolas por cuminsa haya mas bida y bira un districto mas atractivo pa turista como tambe local.

Potret: Hilario Donker