Arubahuis di Aruba a reuni cu organizacionnan di studiante

ORANJESTAD (AAN): Informacion for di Den Haag ta indica cu Arubahuis a tene recientemente un reunion cu diferente organizacion di studiante.

Meta di e reunion aki ta pa conoce otra aun mihor y intercambia riba topiconan cu ta interesante pa tanto e organizacionnan y Gabinete di Aruba (Arubahuis).

   E programa a cuminsa cu un introduccion di e organizacionnan den cual nan a papia riba nan metanan pa studiantenan y riba cual terenonan ta organiza actividadnan.

   Directora di Gabinete di Aruba Joselin Croes LL.M/M.Sc a guia e session cu a consisti di algun preguntanan manera nan contacto cu Gabinete di Aruba, contacto cu e grupo di mentornan. Señora Croes tambe a puntra e organizacionnan cual tabata nan actividad/evenemento mas exitoso den e ultimo añanan, con grandi e publico tabata ta y con a logra pa haya asina hopi hende.

   Otro punto cu tambe a keda lansa na e organizacionnan ta ki tipo di actividad e organizacionnan ta mira cu por worde organiza en cooperacion cu Gabinete di Aruba. Importante pa sa ta cual temanan ta interesante pa studiantenan. Esaki en conneccion cu workshops cu Gabinete di Aruba ta pensa pa organiza.

   Minister Plenipotenciario demisionario mr. Ady Thijsen a bisa di ta contento cu hopi organizacion di studiantenan a bin na e encuentro aki. E mandatario a bisa cu Gabinete di Aruba a bin ta organizando diferente reunionnan cu studiantenan pa tende kico ta biba cerca nan y con Gabinete di Aruba por duna un aporte cu por contribui na e exito den nan estudio. Mescos cu e grupo di studiante ta na su lugar pa papia tambe cu e organizacionnan di studiante pa mira ki tipo di cooperacion por bin entre e organizacionnan y Gabinete di Aruba.

   Sr. Thijsen a bisa cu guia di studiante ta keda un trabao importante pa Gabinete di Aruba y tambe estrecha e contacto cu studiantenan Arubiano pa asina tambe sondea e posibilidad y animo bou di nos hobennan pa despues di a caba cu nan estudio, nan regresa Aruba pa contribui na bienestar y progreso di Aruba. E potretnan ta cortesia di Arubahuis.