Aruba y Corsou ta fortalece cooperacion pa digitalisacion di enseñansa

Minister Gerlien Croes

ORANJESTAD (AAN): Den cuadro di fortalece e lazonan di cooperacion entre islanan den Reino Hulandes, Minister Gerlien Croes, a invita un delegacion tecnico for di ministerio di OCWS di Corsou pa contribui na e desaroyo di un plan structural pa digitalisa e veld educativo na Aruba. E colaboracion aki ta un paso strategico pa implementacion di un sistema moderno, integral y eficiente, adapta na e necesidadnan actual y futuro di nos sistema di enseñansa.

E delegacion for di Corsou, consistiendo pa Wladimir Kleinmoedig, Samira Saab y Derrick Jonis, a presenta e sistema avansa cu tin na Corsou, conoci como CLOA – Centraal Landelijk Onderwijs Administratie. Esaki ta un dashboard digital interactivo cu ta centralisa dato esencial tocante cantidad y nivel di studiantenan, maestro, infrastructura, leermiddelen digital y conectividad tecnologico di scolnan. CLOA a logra crea un plataforma central cu por facilita decisionnan strategico riba base di “real time data”.

Minister Gerlien Croes a expresa su gran impresion y admiracion pa e nivel di implementacion cu Corsou a logra, y ta sumamente agradecido pa e compromiso di su colega, Minister Sithree van Heydoorn di Corsou, pa cu nos isla hermana por a comparti su conocemento, experiencianan y ‘best practices’ den e area vital aki.

“Nos ta para den un momento crucial den transformacion di nos sistema educativo, y pa yega na e nivel cu nos ta aspira, nos mester pone enfasis riba innovacion, digitalisacion y uzo inteligente di dato,” Minister Gerlien Croes a enfatisa.

Un roadmap con enfoke integral y adaptacion local

E obhetivo principal ta pa implementa un dashboard similar na Aruba, adapta na e realidad local, cu por brinda acceso na informacion relevante pa cada actor den e cadena educativo – cu respet pa autorizacion y privacidad.

Creando un fundeshi sostenibel: 5 M’s y stuurgroep ministerial

E framework di Corsou ta basa riba e 5 pilarnan: Mucha, Maestro, Mayor, Material y Maneho – un enfoke holistico cu ta pone e mucha central. Den e contexto aki, un Ministriele Stuurgroep Digitalisering en Innovatie in Onderwijs lo mester wordo implementa, cu ta coordina implementacion den area di infrastructura fisico, leermiddelen digital y conectividad. Tambe ta contempla un ‘gap analysis’ den legislacion actual y un plan di transicion ordena.

Compromiso y continuidad interinsular

Actualmente tin proponi pa formalisa e colaboracion cu Corsou via un Memorandum of Understanding (MOU), pa cooperacion riba tereno di innovacion y digitalisacion di enseñansa.

Otro puntonan di cooperacion ta inclui: blueprint conhunto pa implementacion y coordinacion na nivel di e-government, intercambio di experticio (CISO, digitaliseringsunit), y eventualmente participacion structural den un 4 landen overleg specificamente dedica na innovacion y digitalisacion.

“Esaki no ta simplemente un proyecto tecnico, pero un movecion transformativo pa futuro educativo di Aruba. Nos ta inverti den conocemento, den capacidad, y den igualdad di oportunidad pa cada mucha, cada scol y cada docente. Hunto cu Corsou, y eventualmente cu Boneiro y Sint Maarten, nos por lanta un plataforma regional cu ta pone noh hubentud central den progreso y sostenibilidad,” Minister Gerlien Croes a conclui.