Aruba tin suficiente y hasta demasiado taxi pero e problema ta trafico stagna di tur dia

Ronny Gomes, taxista ta splica:

* Ta 515 taxi tin pa duna servicio 

ORANJESTAD (AAN): Ronny Gomes, taxista, a reacciona riba un percepcion cu tin na Aruba, cu no tin suficiente taxi pa transporta turistanan. No obstante, e ta bisa cu suficiente taxi y hasta di mas.

   Tin 515 taxi, pero e problema mas grandi ta keda e trafico stagna tur dia, tur ora na tur caminda di Aruba.

   “Tin suficiente taxi of hasta taxi di mas. Locual ta pasa ta cu pueblo ta lubida di wak e trafico cu tin na Aruba. 24-7 tin trafico tur caminda. Siman pasa airport a mustra cuanto hende para den rij, y ora mi a bin bek ya e rij a caba”, Gomes a vocifera, y a sigui splica tur otro situacion cu ta stroba e taxistanan yega na tempo, unda nan ta wordo yama pa bay, entre otro e tourbus cu musica unda turistanan hasta ta balia wanta e trafico. “Nan ta bisa cu taxistanan ta core duro, pero nan no ta sinti e presion ora nan ta wordo yama riba radio y ta reclama cu nan ta yama taxi y taxi no ta yega”, el a bisa.

   Tambe el a referi na e cantidad di bais cu tambe ta core riba caminda, y ta wanta e trafico, y turistanan ta reclama. “Con bo ta bisa mi cu no tin suficiente trafico si mi ta pega den trafico?”

   El a remarca con dificil e trafico ta bira riba e rutanan di hotel, y stagnamento di trafico den e rotondenan, y a enfatiza hopi ora di bay airport, caminda nan ta pega bek si tin cu bay bek, pasobra nan kier duna servicio pero tur caminda di Aruba a stagna di trafico. Tambe e ta cuestiona ora tin actividadnan di careda di marathon cu ta sali di un hotel, cu nan ta stroba otro hotelnan unda tin turista ta warda taxi.

   Ora tin bike tour y otro actividadnan cu hende ta subi caya, ta stroba e trafico. E situacion aki ta frustra e hotel, e bellboys pasobra nan tin e turistanan riba nan lomba, e taxistanan ta wordo frustra pasobra nan ta yama nan pa duna servicio y nan no por yega na tempo pasobra nan ta pega den trafico tin biaha hasta 45 minuut, prome cu nan yega.