Aruba ta introduci salario minimo pa ora entrante 1 Januari 2026

Decision a cay

ORANJESTAD (AAN): Minister di Labor mr. Wendrik Cicilia conhuntamente cu Departamento di Labor y Investigacion (DAO) ta anuncia introduccion di un salario minimo pa ora entrante 1 di Januari 2026.

   Cambionan:  Esaki ta e cambionan principal den e ley di salario minimo:

(1) Dia 1 di september 2025, den Parlamento di Aruba a aproba unanimamente e cambionan den e ley di salario minimo pa asina introduci un salario minimo pa ora. Entrante 1 di januari 2026 ta bira obligatorio cu  tur empleado di 18 aña of mas, cu ta gana e salario minimo, mester gana por lo menos e salario minimo pa ora sin importa e cantidad di ora cu ta traha. E salario minimo pa ora entrante 1 januari 2026 ta bira e suma di Afl. 11,58. E cambio aki ta encera tambe cu tur empleado cu ta traha menos cu 40 ora pa siman (p.e. 5 ora pa siman) tin cu wordo paga e suma di Afl. 11,58 pa ora.

(2) Tambe a aproba pa haci un coreccion den e calculacion di un salario minimo pa luna. Entrante 1 di januari 2026 lo uza factor 4,333 (antes tabata 4,28) pa haci e calculacion. Factor 4,333 ta e resultado di 52 siman total den un aña dividi door di 12 luna cu ta bira 52/12 = 4,333.

(3) Posicion di e empleadonan domestico ta bira mas cla. Pa e empleado domestico cu ta biba cerca su dunado di trabao ta conta un salario minimo di Afl. 5,35 pa ora pa motibo cu e dunado di trabao ta cubri e extra gastonan di biba den forma di alohamento y cuminda di e empleado. Pa tur otro empleado domestico cu no ta biba cerca su dunado di trabao e salario minimo di Afl.11,58 pa ora ta aplicabel.

   Con ta calcula e salario minimo pa siman of pa luna: Pa calcula e salario minimo pa siman lo uza e siguiente formula:

(*) Salario pa siman = cantidad di oranan di trabao pa siman x salario minimo pa ora.

   Pa calcula e salario minimo pa luna lo uza e siguiente formula:

(*) Salario pa luna = cantidad di oranan di trabao pa siman x salario minimo pa ora x factor 4,333

   Mas detaye: Pa mas informacion riba e introduccion di salario mínimo pa ora, por bay e website di DAO: www.daoaruba.com Tin un documento Frequently Asked Questions (FAQ) riba e salario minimo pa ora disponibel den diferente idioma,  Tambe bo por manda email na This email address is being protected from spambots. You need JavaScript enabled to view it.

Si bo kier papia cu hende, por yama na 523-7720, email This email address is being protected from spambots. You need JavaScript enabled to view it. of por bishita oficina di DAO situa na Paardenbaaistraat 11 entre 7.30 am pa 12:00 pm y 1:00 pm pa 3:30 pm.