Aruba no por keda importa productonan demasiado leu di nos solamente sin tin un plan B

Segun señor Hubert Dirks di Compra LTD:

ORANJESTAD (AAN): Den un entrevista recien cu DIARIO, señor Hubert Dirks di Compra LTD, a duna di conoce cu prijsnan, specialmente di fruta y berdura fresco lo sinti e efecto di subida den e tempo nos dilanti pa motibo di subida di prijs di combustibel. Aruba ta importa practicamente tur cos di afo y debi na e desaroyonan mundial, prijsnan di combustibel ta sigui subi. Sinembargo, segun señor Dirks, tin un solucion hopi facil cu pa hopi tempo a trece na orea di Gobierno di Aruba. 

El a haci referencia na un dicho conoci cu ta bisa: “Miho un bisiña di cerca, cu un bon ruman di leu”. Cu esaki e kier enfatisa cu Aruba no por keda importa productonan demasiado leu di nos solamente sin tin un plan B. Como e importador mas grandi di cuminda, e ta bisa cu no tin importacion for di paisnan cerca entre otro Venezuela, Colombia y Santo Domingo. Un solucion ta, segun e, pa cuminsa busca productonan mas cerca di cas. 

Tambe el a menciona cu mester cuminsa wak kico ta bay haci cu e stock di cuminda cu tin na Aruba den caso di situacionnan cu cosnan bay malo, si mester subi prijs un tiki mas. Den varios ocacion a trece e plan di ‘Food Security’ na gobiernonan di Aruba, entre otro tawatin mester di tereno y cooperacion di e gobiernonan cu a sinta pero ningun a pone atencion adecuado. 

E ta haci comparacion cu e Gobierno di Hulanda unda tin un minister cu den su cartera tin inclui ‘Food Security’ mientras cu Hulanda mes ta produci. “Na Aruba nos no ta produci nada y ora cu barco pega ta core yama mi pa puntra cua producto y cuanto tin den stock. Nos ta wardando e baca hoga pa despues nos tuma accion”, señor Dirks ta puntra.

Señor Dirks ta enfatisa cu Food security, siguridad di alimento, mester bira un prioridad strategico pa Aruba. Esaki ta encera pa Aruba ta prepara cu pa un tempo largo, tin cuminda suficiente pa pueblo. Mester bin cu un plan di emergencia si cos bay malo, pa sigura cu den tempo malo, tin suficiente cuminda pa henter comunidad.