Aruba lo bay cera 2024 cu ningun Pagara na benta

E aña aki ningun cargamento a drenta

• Ningun vuurwerk no a drenta for di China
• Stock di fireworks di Merca no ta inclui Pagara 

ORANJESTAD (AAN): Manera cu DIARIO a publica caba na luna di October, e biaha aki e nerviosismo di companianan di shipping pa transporta klapchi y demas tipo di vuurwerk den container riba nan barconan fo’i China pa cruza Oceano Pacifico, tabata indicacion suficiente cu lo bay tin scarcedad enorme na algun pais pa e tradicional forma di core cu aña bieu.

   Exportadornan na China a usa un otro compania di transporte, pero esaki a topa cu retraso grandi, y kizas te Januari nan lo yega Aruba.  Esaki aparentemente tin di haber cu awor a bira mas estricto cu ley na waf di Kingston (Jamaica), cu ta un hub importante di container.  Un ley di como 100 aña pasa yama “The Gunpowder and Explosives Act” por duna multa na un Capitan di barco cu mara na e isla y tin abordo polvo of explosivonan peligroso, sin cu e tin un licencia of permiso pa drenta teritorio di Jamaica.

   Esey a bira un obstaculo grandi cu awor ta mustrando cu berdad na Aruba ta djis un man yen di klapchi procedente di Merca lo wordo bendi, hunto cu par di klapchi cu a resta di fin di 2023.

   Rubin Ponson kende ta experto di vuurwerk pa Departamento di Obranan Publico, esta DOW, a confirma cu e klapchinan di Pagara lo no tin ni 1 na benta awor pa fin di 2024. 

   El a splica cu normalmente e Pagara ta wordo importa for di China, y debi cu ningun container a yega Aruba procedente di e pais ey, esey nifica cu ningun klapchi costumbra di fabricacion Chines lo no wordo bendi.  Solamente e poco cu a resta di aña pasa.  Ademas ningun Pagara a resta di 2023 tampoco pa wordo bendi e luna aki.

   No ta na Aruba so esey a socede, sino e comerciantenan di Curaçao y tambe Bonaire a keda sin ricibi container di China.  Pesey a core busca y logra trece algun container chikito di klapchi procedente di Merca.  Esakinan ta algun klapchi chikito, fontein, y flowerbeds chikito.

   Pa prome biaha Aruba lo bay conoce un cambio di aña cu poco klapchi, sin pagara, y poco flowerbeds pa bisa ayo na e aña bieu.

   Algun hende a expresa caba cu nan lo keda contento si acaso no tin klapchi pa bende, como cu nan ta sinti cu nan cartera lo keda yen fin di aña, y kizas animalnan por pasa un siman sin stress y dolor di cabez pa doñonan.