Aruba inclui awor den lista di WHO cu tin waf autoriza pa otorga “Ship Sanitation Certificate”

ORANJESTAD (AAN): World Health Organization (WHO) ta encarga pa duna conseho riba maneho pa control di enfermedadnan transmitibel internacionalmente.

Esaki nan ta haci door di stipula medidanan di prevencion di cual International Health Regulations (IHR) ta uno.

   E asina yama IHR, ta un regulacionan international acorda pa 196 pais na mundo (incluso hulanda y pues Aruba) pa re-enforsa e abilidad di paisnan pa detecta, analysis, raporta, y responde riba eventonan cu por forma un riesgo pa salud publico. Un di e capacidadnan bou di esaki ta encera abilidad di paisnan pa por otorga “Ship Sanitation Certificate” pa evita cu transmision di malesa por tuma lugar den e caso aki riba boto, barco etc.

   Tabata den e siman di 03 pa 07 di oktober cu tabata tey na Aruba un delegacion di RIVM Hulanda pa a brinda e curso di ‘Ship Sanitation Certificate’ na e islanan di reino y Aruba. E curso aki tabata necesario pa como Aruba nos por tin e autoridad cu tin conocimento necesario di tur e exigencianan stipula conforme “International Health Regulations (IHR)”, pa por otorga un “Ship Sanitation Certificate” na un barco cu mester esaki. Cada Ship Sanitation Certificate tin un validez di 6 luna y sin e documento aki valido un barco, boto etc por worde nenga pa drenta un puerto, mirando cu e barco, boto por worde considera como un fuente di contaminacion.

   Den pasado Aruba tabata otorga “Derating Certificate”, pero na aña 2005 WHO a bin cu revision di e “International Sanitary Regulations” , el a worde adapta pa “International Health Regulations (IHR)” unda cu e certificado di “Derating Certificate” a bira “Ship Sanitation Certificate”.  Di manera cu  Aruba a perde e autoridad pa haci inspeccion riba boto, barco etc y alavez pa otorga un prueba di sanidad. Un di exigencia ta cu Aruba mester a haci adaptacion den ley y e inspectornan mester ta entrena ariba e tereno di e “International Health Regulations”.

   Pero apenas despues di 3 siman cu personal di Dienst Warenkeuring en Hygiene di DVG a haci e curso aki y a obtene nan certificado, Aruba ta oficialmente riba e lista di WHO como un puerto mas unda boto, barco etc por acudi pa inspectornan di Departamento di Salud (DVG) - cu ta encarga pa implementa e medidanan sanitario y di higiena ariba e barco conforme e exigencianan stipula den “International Health Organization (IHR)” - lo por otorga e “Ship Sanitation Certificate”.

   Pa medio di Minister di Salud Publico Dangui Oduber despues di hopi aña porfin esaki a bira un realidad y DVG ta contento cu 7 di su empleadonan di Dienst Warenkeuring en Hygiene por a participa na e curso aki y ta conta cu e certificacion pa conduci e inspeccion aki.