Aruba Conservation Foundation mustrando riba e importancia pa tin area natural protehi

ORANJESTAD (AAN): Blue Marine Foundation ta un fundacion di Reino Uni cu a wordo estableci na aña 2010 y ta dedica specialmente na proteccion di lama, restauracion di ecosistema marino,

y promocion di pesca sostenibel pa garantisa lama sano pa futuro generacionnan.

   E fundacion ta asisti otro organizacionnan na mundo pa cumpli cu e metanan pa conservacion marino. Nan ta traha na 29 pais y tsolamente ta traha riba invitacion di e pais. Aruba Conservation Foundation (ACF) tin cinco aña caba trahando cu nan. Y recientemente, ACF hunto cu Blue Marine Foundation ta asistiendo Directie Natuur en Milieu (DNM)  pa yega na e meta di 2030. E meta aki ta un acuerdo entre tur e paisnan cu ta cay bou di Convencion di Diversidad Biologico.

   Señora Sietske van der Wal di ACF, den un entrevista cu DIARIO a duna di conoce cu pa garantisa cu bio-diversidad tin su espacio di biba y sobrevivi, ta importante pa tin por lo menos 30 porciento di mundo, den awa y riba tera. Den e convencion a dicici cu pa prome cu aña 2030, cada pais mester asigna 30 porciento di tera, y 30 porciento di lama, por lo menos, como areanan natural protehi.

   Señora van der Wal a duna di conoce cu actualmente Aruba tin riba tera casi 25 porciento protehi y falta menos cu 6 porciento ainda pa cubri. DNM hunto cu Departamento di Infrastructura lo tin pa bay asigna e areanan aki cu falta.

   Sinembargo, den lama si falta casi e 30 porciento completo ainda. Te ainda tin 0.2 porciento so di nos lama protehi. Esaki ta e motibo tambe, señora van del Wal a bisa, cu a cuminsa cu e proceso pa asigna e 30 porciento aki den lama di Aruba. E ta un proceso bou encargo di DNM pero Blue Marine Foundation, cu tur nan experiencianan mundial, ta asisti den esaki, hunto cu ACF, cu actualmente ta manehador di tur e areanan protehi na Aruba.