Areglo fiscal KOR ta exonera e comerciante chikito nan di paga BBO riba un entrada anual menor na 84 mil florin

DIMP tin 2 aña cu a introduci KOR --- ORANJESTAD (AAN):  Diabierna mainta, durante un rueda di prensa, Meverly Romano, vocero di Departamento di Impuesto (DIMP), a referi na un tema hopi importante pa tur esnan cu tin un 'eenmanszaak' y esaki ta e tema di  di KOR.

El a laga sa cu KOR (Kleine Ondernemersregeling), ta e areglo pa comerciante chikito. Esaki ta un areglo fiscal, un facilidad, cu a drenta na vigor na aña 2019.

DIMP tin un par di aña caba trahando cu e areglo aki cual ta regla den articulonan di ley di BBO, BAVP y BAZV.

  Romano a remarca cu e areglo pa comerciante chikito ta pa 'natuurlijk persoon' cu un eenmanszaak residencia na Aruba. Kiermen cu e ta valido pa e comerciantenan cu tin un empresa propio. E grupo aki ta bin na remarca pa KOR.  

Ley ta splica ken tur ta bin na remarca. E empresa no mag di tin un volumen di benta di mas cu 84 mil florin pa aña. "Tanten cu bo benta, bo omzet ta keda 84 mil of menos, e comerciante lo por bin na remarca pa pidi pa a areglo aki" e PR di DIMP a señala.

Ley ta duna tambe ki ora un comerciante no ta bin na remarca y esaki ta ora cu no ta cumpli cu e condicionnan, pero tambe ta duna excepcion na e comerciantenan cu ta negocia por ehempel den real estate. Nan no ta bin na remarca pa KOR. Tampoco esnan cu ta huur un apartamento y cu esaki no ta wordo uza como su residencia principal, sino cu e ta bay hincaun negoshi den dje. Esun cu ta huur tin cu paga BBO y no ta bin na remarca pa KOR.

Por menciona tambe esnan cu ta huur un cas of un camber pa Airbnb, nan tampoco ta cay den e grupo cu ta haya exoneracion di KOR.

Meverly Romano a splica kico KOR ta duna na e comerciante chikito. KOR ta un facilidad fiscal y ta duna e comerciante chikito e chens cu e no tin mester di paga BBO, BAVP ni BAZV durante full e aña.

A enfatisa cu e deber di cumpli cu entregamento di e declaracion y haci pago tur luna manera tur otro comerciante, e no ta bay tin'e. Un bes cu e comerciante chikito tin e KOR, e ta hay'e for di Inspecteur y durante henter aña e no tin mester di kibra cabes pa haci pago di BBO, BAVP, of BAZV ni haci e declaracion tur luna.

"Esaki ta un alivio hopi grandi pa mayoria di e comerciantenan aki pa motibo cu por ehempel, si den un luna nan a genera 5 mil florin na omzet na e benta, e ora di e 5 mil eynan e tin cu bay paga 300 florin na belasting, e 300 florin ey, e ta retene den su negoshi pa e cumpli cu otro inversionnan cu e tin of pa e cubri otro gastonan cu e tin", Sra. Romano a duna di conoce.