Alarma mundial pa peliger pensioen di behez impagabel!

Paisnan grandi no ta papia mas di opcion pero necesidad accion

*Organisacionnan mundial kier mihor maneho di edad laboral

*Edad pro medio ta subi super rapido y fondonan ta na peliger 

ORANJESTAD(AAN)—Ta posibel mantene fondonan nacional pa pensioen di behez como e entrada pa personanan cu debi na nan edad no por participa mas na e sector productivo?

Esaki ta e pregunta serio cu mester wordo contesta na Aruba tambe segun expertonan cu ta teme pa resultadonan pa tur persona cu pa motibo di e campaña cu AVP a hiba, ta en espera di un aumento drastico di nan pensioen di behez, cu ta algo cu ta bay completamente contra alarma cu instancianan internacional ta bati na entrada di 2025.

Cifranan produci pa Nacionnan Uni, ta causa panico politico y gubernamental na nivel mundial cerca paisnan poderoso cu ta teme pa continuacion di pensioen di behez manera e ta conoci actualmente.

Informacionnan di instancianan di Nacionnan Uni entre otro, ta indica cu hasta e informacionnan di 10 aña no por wordo mantene mas como base pa maneho enfrente pensioen di behez, manera mundo conoce e conepto di asistencia social pa aumento di edad.

Despues di e pandemia, cu hopi hende na principio a pensa cu lo nivela e cantidad di persona cu pa nan edad un dia lo mester ricibi pensioen di behez, un situacion completamente diferente a surgi.

Estudionan a demostra cu un grupo di personanan di edad avanza, lo no solamente goza di un bida mas largo pero tambe di mihor salud, mientras di otro banda e cantidad di personanan cu problema di salud tambe ta crece.

Tal manera DIARIO a cuminsa adverti for di 2024 a base di e prome estudionan realiza cu e topico di aumento pisa di pensioen di behez cu a bira promesa y a influencia resultado di eleccion, e cantidad di personanan cu ta nace y asina ta forma e grupo di hobennan cu mester paga e gastonan pa pensioen di behez, ta sigui baha.

Fin di 2024 a topa mundo cu a alarma grandi cu ta wordo bati cerca e instancianan mundial di salud mas importante, cu ta mustra cu e problemanan di e forma cu ta bay atende cu pensioen di behez pa e personanan di edad avanza, mester wordo bon discuti y cu mester yega na plataforma internacional na ahustacion pa asina evita un desastre financiero cu ta amenaza fondonan di pensioen di behez.

Hasta ta bini awor dilanti e pregunta cu DIARIO tambe a haci na 2024, cu no ta bira tempo pa cuminsa mustra Pueblo riba e realidad y habri caminda pa mas participacion den aseguro priva pa pensioen.

Den publicacionnan mundial, esaki hasta ta wordo considera como solucion loke ta nifica cu tin pensamentonan cu pensioen di behez no mester wordo domina dor di politiconan pero mester wordo studia cu profesionalnan y ehecutivonan di sector priva pa asina determina con halto por subi pensioen di behez sin causa un desastre financiero cu ni gobiernonan ni sector priva por soluciona.

DIARIO den e proximo dianan ta keda den contacto cu informantenan valioso cu ta mustra riba e problema serio di crecemento di poblacion no pa medio di mucha cu ta nace pero pa medio di e forma cu edad ta subi.

Nacionnan Uni ta compilando cifranan di tur pais, cu ya a sostene cu e cantidad di mucha cu ta nace ta sigui baha y cu e efecto cu esaki tin pa personanan cu lo mester aporta na entrada pa por duna pensioen di behez ta baha.

Na mes momento ta wordo confirma cu e resultado ta, cu e sumanan cu e grupo productivo mester paga ta bira impagabel pa nan.

Manera informacionnan di instancianan oficial mundial ta indica, paisnan manera Inglatera, Australia, Canada, China, India, cu por enfrenta exigencianan mas halto pa contribucion di Gobierno na Pensioen di Behez, ta den problema serio cu e falta di balansa den entrada y gastonan cu pensioennan di behez mester tin.

E produccion economico di paisnan ta sufri di menos hoben pa drenta e proceso laboral cu mester expande cu mas hende di edad avanza cu ta keda na trabou, loke ta haci cu Gobiernonan mester pone placa riba mesa, loke na su turno ta nifica cu belasting mester subi na un forma cu e ta bira impagabel pa e pueblo tambe.

Rapportnan oficial ta bisa cu ya no ta un opcion pa gobiernonan revisa nan fondonan di pensioen y na mes momento cuminsa adapta na e cambionan di edad cu no ampliacion di mas peso di pensioen pero cu participacion mas amplio na productividad ahusta na e realidad nobo.

Sigui aumenta e pensioen di behez a base di aumento di prima, no ta factibel sin mas manera publicacionnan oficial ta indica pero awor mester traha riba hasta familia mas grandi.

Pensioen di behez mester ta parti di un revision total di comunidad existente manera profesionalnan ta trece dilanti.

DIARIO den e dianan venidero lo sigui informa Aruba, caminda contra e opinion di expertonan, pensioen di behez a bira un forma politico pa cumpra voto pero tambe un posibilidad pa e backfire cu resultadonan desconoci te awor pa Aruba.