Agresion contra prensa no por wordo tolera!

Comentario:

Skirbi pa Mercedes Monge 

Mi a tuma nota di e incidente cu a tuma lugar cu un miembro di prensa, cu a wordo agredi fisicamente door di un ciudadano, den e caso aki un persona hoben yiu di un funcionario publico, loke riba su mes no ta carece di relevancia.

Ningun persona, independiente di su status social den e comunidad y ni si e ta liga na cierto herarkia, por sinti su mes cu e libertad di mishi cu e integridad fisico di un miembro di prensa, pasobra p’esey tin instancia legal pa pone denuncia si e persona ta sinti su mes ofendi den su integridad, verbalmente, of cu amenaza.

Mi por corda algun aña pasa cu un homber a agredi fisicamente un colega femenino, y hasta a kibra su camera di trabao, cu cual e tabata cumpliendo cu su trabao, y e hecho aki a crea caba un precedente, pasobra segun mi, e agresor no a haya su castigo mereci.

Mi a ripara, door di reaccionnan riba facebook, cu algun persona a aproba loke a pasa recien, cu e miembro di prensa, comosifuera cu nos pueblo tin e derecho di tuma ley den su man, mientras cu otro ciudadanonan a desaproba y condena e acto aki, cu pa motibo di a sosode contra prensa ya caba ta un atentado contra nos democracia.

Logicamente, ta di spera cu husticia haci su trabao na un forma obhetivo, y di manera cu tur ciudadano bira conciente cu agresion fisico of verbal, toch no ta e accion corecto pa cuestiona of defende un diferencia di opinion, ni pa manifesta contra prensa como e di cuater poder cu e ta! Agresion fisico contra prensa no mester wordo tolera, loke no ta nifica cu prensa tin tur libertad pa haci y deshaci den pueblo, pasobra nos tambe mester cumpli cu loke ley na Aruba ta stipula, pa loke ta regarda nos responsabilidad y obligacion encuanto nos libertad di expresion. Esaki ta mi humilde opinion, como miembro di prensa.