Agentenan a haya pisca daña durante control riba boto

Wardacosta

ORANJESTAD (AAN):  Ayera mainta Wardacosta a realiza un control riba un boto local cu nomber 'K-FISHING' cu tabata biniendo rumbo pa Barcadera. For di investigacion a saca afor cu e boto a bay busca pisca pa cumpra cerca un otro boto den awanan teritorial di Venezuela.

Abordo di e boto tabatin jugnan yena cu pisca y tambe piscanan poni abao den e boto den solo.

Durante control personal di Wardacosta a ripara cu tabatin pisca abordo cu ta mustra daña. Mesora a pone instancia concerni na altura y esakinan a constata cu tabatin pisca cu no ta apto pa consumo. Basa riba esaki a duna ordo pa destrui e piscanan.

Wardacosta ta informa cu nan lo sigui cu controlnan riguroso riba botonan cu ta bay tuma mercancia pafor di awanan teritorial di Aruba.