Aeropuerto di Aruba hunto cu Inmigracion Mericano y iProov ta bin cu proceso EPP

Pa pasaheronan biahando pa Merca

• Mas rapido bo ta yega awor na bo Gate 

ORANJESTAD (AAN): Aruba Airport Authority N.V. (AAA), den colaboracion cu U.S. Customs and Border Protection (CBP) y iProov, ta contento pa anuncia cu e proceso “Enhanced Passenger Processing” (conoci como EPP) ya caba ta disponibel na e facilidad di U.S. Pre-Clearance di Aruba.

   Despues di a termina cu e instalacion di e ‘hardware’ na inicio di e siman, diamars CBP a cuminsa procesa e biaheronan Mericano haciendo uzo di EPP.

   EPP ta ofrece un experiencia di salida moderno y biometrico diseña pa haci e proceso di pre-clearance mas lihe, mas suave y mas eficiente. EPP ta den uzo den diferente aeropuerto manera Orlando International Airport (MCO) y Dublin Airport, EPP ta verifica identidad den algun seconde, di e manera aki ta reduci e tempo di espera y ta crea un fluho sin problema pa e ciudadanonan Mericano cu ta sali pa bolbe nan cas.

   Con EPP ta funciona:  E sistema di EPP ta wordo splica aki: (*) Pa medio di un scan biometrico lihe cu ta cuadra cu cara di e pasahero cu su paspoort den algun seconde. (*) Procesamento adapta pa grupo, cu ta permiti pa acomoda famia y mucha.  (*) Interaccion breve cu un oficial di CBP, sigui pa un acceso direct na e porta di embarcacion.  (*) Tempo di warda reduci, locual ta permiti e pasaheronan pa disfruta di nan ultimo momentonan na Aruba.  (*) EPP no ta rekeri un solicitud, y ta disponibel automaticamente pa e ciudadanonan Mericano cu ta sali di Aruba.

   DIARIO a compronde di algun pasahero Arubiano cu ya a pasa den esaki, cu nan no a keda ni 20 seconde dilanti e aparato di scan cara di EPP, y ya e funcionario di CBP Mericano a bisa nan: “Yes, go ahead”, pues cana bay numa pa nan Gate.  Nada di wardamento largo mas.

   “Introduccion di Enhanced Passenger Processing ta un logro oportuno y importante, yudando aeropuerto pa ofrece un experiencia di salida mas trankil y mas eficiente pa e pasaheronan cu ta biaha pa Merca, specialmente mientras nos ta avansa den e fase di construccion di expansion Gateway 2030”, tabata expresion di Jurgen Benschop, Chief Operations Officer na Aruba Airport Authority N.V. Benschop a continua bisando: “Conhuntamente cu nos socionan, nos ta mantene nos compromiso cu innovacion y excelencia di servicio y nos ta gradici e pasenshi di nos pasaheronan mientras nos ta sigui construi un aeropuerto mas moderno y eficiente pa futuro.”

   “Nos ta contento di por trece Enhanced Passenger Processing pa Aruba”, asina Wendell A. Roberts, Port Director, CBP Aruba Pre-Clearance a bisa. El a continua bisando cu “E tecnologia ta fortalece siguridad mientras e ta ofrece un experiencia di salida moderniza y acelera pa e ciudadanonan Mericano cu ta regresa nan cas”. 

   “Nos ta contento di por a partner cu Aruba Airport Authority y CBP pa trece EPP na e area di Pre-Clearance di Merca na Aruba”, asina Andrew Bud, fundado y CEO di iProov a expresa. Bud a continua bisando cu: “E implementacion aki ta mehora e eficiencia operativo y ta garantisa un ingreso lihe y sin complicacion na Merca, locual ta permiti e pasaheronan Mericano cu ta saliendo, incluyendo nan famia y esnan cu tin mester di asistencia, tin mas tempo pa disfruta di e dushi isla.”

   Mirando cu mayoria di e bishitantenan cu ta bin Aruba ta bin for di Merca, e lansamento di EPP ta marca un logro importante pa mehora e experiencia di biahe y fortalece e eficiencia operativo di aeropuerto. Door di acelera e proceso di pre-clearance y reduci e tempo cu e pasahero mester warda, EPP ta facilita e biahe di e pasaheronan Mericano cu ta bandonando nos isla. E proceso optimalisa ta mehora e experiencia di e pasahero y ta sostene nos esfuersonan continuo pa optimalisa e operacionnan di aeropuerto durante e temporadanan di mas halto.