Adulto mayor a bira malo tras di stuur y fayece den accident den De La Sallestraat

Paramediconan a purba reanima e victima pero no a logra

ORANJESTAD (AAN): Diamars mainta algo prome cu 12’or a sosode un accidente na e rotonde di De La Sallestraat cu Caya Ernesto Petronia y Profesor Lorentzstraat.

   Aki un auto sedan Buick Regal color blanco, cu un adulto mayor tras di stuur, a perde control riba su stuur un poco prome cu e yega e rotonde.  El a sigui pasa straight, subi acera casi dal den dos palo di luz instala banda di otro, pero si a ranca un tubo cu borchi di trafico, sigui bay pariba.  Aki el a dal den di dos borchi di trafico, y ainda a sigui bay pariba.

   Despues di a caba di ranca e di dos borchi, el a core riba e pida na banda di parkeer, y a bay dal tras di un Kia Rio hatchback color blauw scur staciona dilanti La Salle College.

   A sali na cla cu e adulto mayor masculino tras di stuur di e Buick Regal, a bira malo na forma agudo na e rotonde, pues no tabatin control mas riba su stuur ni riba e pedalnan di trot ni di brake.  Ta e impacto contra e Kia Rio a pone e auto stop.  Alumnonan eybanda pafo di La Salle College a spanta, y varios persona a core yega cerca.

   Paramediconan trahando: E testigonan a bin topa cu e chauffeur no ta reaccionando, y mesora pa 11:54 am e yamadanan a cuminza drenta na Central di Polis.  Hendenan a informa di e accident, y cu e chauffeur lo a bira malo y pesey a ocasiona e impactonan aki.

   Ademas di manda Polis, a core avisa Ambulance tambe.  Mirando cu e adulto mayor masculino no tabata reacciona a manda dos Ambulance pa yuda miho.

   Ora cu Paramediconan a yega, nan a baha e chauffeur pone drumi abao, y a pone ECG Mashin na su curpa, y a mira cu e no tin señal vital.  A cuminza practica CPR y pone algun awa di bida pa duna asistencia, pero despues di algun rato a ripara cu nada mas ta yudando.

   Manda pidi pa Docter: No a keda ningun recurso, cu djis pidi Polis pa manda Docter na e lugar.  E accident aki a rekeri tambe personal di Trafico pa atende, y Polis a manda personal di Bureau Slachtofferhulp tambe.

   Docter Forensico di Polis, esta Dr. Voskuil a yega na e lugar, y el a constata morto di e chauffeur Orlando Edmundo Lo-Fo-Sang, naci na Suriname dia 10 September 1951, pues e tin 74 aña di edad.

   Vocero Liliana Rasmijn di Cuerpo Policial a indica na DIARIO cu e accident aki no ta wordo conta como ‘Morto den Trafico’, debi cu e chauffeur a fayece door di problema di salud, y no pa motibo di trafico.

    E chauffeur meneer Lo-Fo-Sang di e Buick Regal aki modelo 1981, ta un ex-docente di LTS di John F. Kennedyschool.  Na su famia y conocirnan, DIARIO y Cuerpo Policial ta manda palabranan di condolencia.