Addonsito Croes orguyoso di The Prime Ministers

ORANJESTAD (AAN):  Como secretario di Stichting Klein Aruba (SKA), Addonsito Croes a expresa e

orguyo cu e ta sinti di por a traha activo cu Omar Harms, Erin Croes y Jeng Leon, Wolff Studio & Co riba e realisacion di e documentario The Prime Ministers.

Tawata un aña di bon structura, estudio,  disciplina y sigur placer cu a trece e producto historico aki cu e publico di 475 invitado den Cas di Cultura a aplaudi sin fin. Den e presentacion The Prime Ministers, ningun momento a sinti e concurencia custumbra di e fanaticonan di partido Mep of Avp.

Bunita tawata pa scucha y mira e lidernan Henny Eman, Nelson Oduber, Mike Eman y Evelyn Wever Croes ser aprecia pa nan parti humano.

Na nomber di cada un cu a haci e produccion aki posibel, un danki grandi. Omar Harms, cu e idea unico aki, a sa di uni tur hende den e sala grandi yena cu harmonia.

“Pabien, mi ruman sin dolor Omar Harms pa bo amistad y confiansa; bo a logra algo nunca antes mira na Aruba.  Stichting Klein Aruba ta orguyoso di a marca historia di nivel halto, hunto cu bo”.

23 di maart ’25 nos lo ripiti e documentario / pelicula aki den Cas di Cultura pa 6:00 pm.  Lo ta bendiendo carchi na porta pa 5:10 pm.

Danki UNOCA, Cede Aruba, ATA, Compra nv, SETAR, Grant Thorton, HCC, APA nv, AAA, Magic 96.5 fm, CMB y Prensa di Aruba.

Potretnan ta cortesia di 24ora.com y Juan Luis di notsochubby productions.