Accion ta necesario pa evita cu mas sangura ta sigui broei

Aruba ta ricibiendo hopi awacero

*Hopi malesa tin cu por plama via di sangura 

ORANJESTAD (AAN): Despues cu asina hopi awacero a cay parti central y west di Aruba siman pasa, kizas ta bon idea pa tur habitante y negoshi tuma accionnan necesario despues di cada yobida, pa elimina lugarnan unda sangura por broei pa asina efectivamente mitiga malesanan cu por plama via di sangura.

   Ta hopi malesa tin cu por plama via di sangura.  Recien Pan American Health Organization (PAHO) a indica cu 2024 ta bay bira un aña cu ta kibra record pa e cantidad di casonan di Dengue y transmision di esaki cu ta enfoca den Sur America.

   PAHO a indica cu den henter region di continente Americano, te cu fecha 9 September 2024, a registra 11.7 miyon caso di contagio di Dengue.  Esaki ta mas di doble e cantidad di caso registra na 2023.  Tur cuatro serotipo di e virus di Dengue ta circulando den region, aumentando e riesgo cu pashentnan por bira hopi malo.

   Pa mas di dos siman, Aruba ta ricibiendo hopi awacero, y pesey accion ta necesario pa evita cu mas sangura ta sigui broei.

   Habitantenan y negoshinan tin di check rond di nan, dos dia despues cu awacero cay, pa ta sigur cu ningun sangura ta broei den bakinan pafo.  Sangura por broei hasta den 1,2 cm di awa.  Esaki no ta hopi, y e tayonan bao baki di mata, tapadera di boter, of saconan benta pafo por yena cu awa y bira un lugar grandi pa sangura pone webo y broei.