Accidente fatal na rotonde di Bushiri a cobra bida di conocido chef

E di dies morto den trafico na Aruba den 2024

Jonathan Velasquez a perde su bida instantaneamente 

ORANJESTAD (AAN): E rotonde di Bushiri riba WVB Boulevard a cobra su di dos victima desde cu el a habri na 2020.

   Dialuna mas o menos 4:50’or di marduga, Central di Polis a ricibi notificacion di un accidente na e rotonde di WVB na Bushiri. Di acuerdo cu e prome informacionnan ricibi, tabata trata di un auto cu a dal den e rotonde.

   Un patruya di polis hunto cu un ambulance a worde manda rapidamente pa e luga di accidente. Na yegada, e agentenan a topa cu un auto di marca Nissan, modelo Tiida color cora cu plachi di number A-79008. E chauffeur di e auto no tabata reaccionando.

   Di inmediato, a pidi Vehiculo di Rescate di Bomberonan pa asisti, mirando cu e chauffeur tabata pega den e vehiculo. Personal di Brandweer a logra saca e victima for di e auto, pero a pesar di e esfuerzo di e paramediconan presente, no a por haci nada pa salba e bida di e chauffeur como cu e no tin señal vital mas.

   Victima di accident: Na luga di e accidente a yega un ekipo di specialistanan di trafico, polis forensico, y Dr. Voskuil, kende finalmente a constata morto di Jonathan Isaac Velasquez Campos, un ciudadano Venezolano naci dia 2 di Augustus 1976, pues e tin 48 aña di edad, pero biba hopi aña caba riba e isla aki, specificamente na Sero Patrishi.

   Departamento di Slachtofferhulp tabata presente tambe pa brinda asistencia na famianan cu casi no por a kere cu nan ser stima a fayece.

   Su historia: Jonathan Velasquez ta un conocido chef riba e isla, cu pa hopi tempo tabata cushina y ofrece servicio di Catering, y tambe tabatin antes e conocido Metropolis Snacktruck cerca di rotonde di Tanki Leendert.  Despues Metropolis a muda bay den un lokaal di Acropolis Plaza ofreciendo su cumindanan cu hendenan local tabata gusta, cu e ora a haya stul cu mesa pa sinta y come paden.

   E tabatin un Restaurant tambe na Palm Beach ofreciendo cuminda na prijs atractivo pa pueblo.  Awor recien el a caba di habri un restaurant den Victoria City Hotel na Playa, y tabata haya hopi cliente pa desayuno y almuerzo.

   DIARIO mes a yega di topa chef Jonathan ta ofrece servicio di Catering durante eventonan priva caminda prensa tambe tabata presente.  Semper un persona cu sonrisa riba su cara, y ta creando cuminda y pasaboca creativo di mas delicioso.

   Mesun rotonde: E caminda unda e accident a socede, ta e rotonde di WVB Boulevard cu den pasado, esta 29 di November 2020 tambe tabatin un accident ora cu un turista femenino coriendo den un V-auto a bay dal linea recta den e rotonde, y a fayece debi na e gravedad di heridanan.

   Den pasado DIARIO ya caba a yega di mustra, cu e “muraya y matanan” riba e rotonde aki ta mezcla demasiado cu e paisahe rond di dje.  Pesey den cierto ocasion, kizas chauffeurnan lo no mira e rotonde nan dilanti.  Den e articulo mas abao di e pagina aki, por mira un sugerencia pa haci e rotonde mas visibel cu cierto borchi.

   Vocero Policial Liliana Rasmijn a confirma na DIARIO, cu Jonathan Velasquez a bira e di 10 morto di Trafico 2024 na Aruba.  Cuerpo Policial di Aruba como tambe DIARIO ta expresa su mas profundo condolencia na señora, yiunan, y conocirnan di señor Velasquez Campos.