Accident riba Diabierna a laga parti di Nuñe sin coriente

ORANJESTAD (AAN): Un takelwagen cu riba su plataforma tabata transportando un Forklift Heavy Duty for di e caminda di Nuñe pa sali na Shiribana (Paradera),

net ora e tabata pasando dilanti Shiribana 3, y tambe apartamentonan di Shiribana 3-B, no a ripara cu un waya di e palo di luz ta un poco mas abao cu normal.  Posibelmente ta trata aki di waya di CableTV.

   Esaki a socede poco despues di 12’or di merdia, y e Forklift riba e Takelwagen a haak na e waya diki aki, cu na su turno a ranca y trek full un palo di luz di voltahe halto cu su wayanan di trafo bin abao.

   Mesora un gran area di Shiribana, Tanki Leendert, Nuñe, Papaya, y Paradera a keda sin coriente.  E palo di luz a kibra den varios pida, y algun parti di e palo a bay finaliza riba autonan staciona eybanda tambe.

   Ningun hende a resulta herida, y Polis a core yega cera e T-weg cu tin net dilanti e edificio nobo di Subway na Shiribana cu ta bay panort rumbo pa Nuñe y Papaya.  Personal di NV Elmar a yega tambe, y a bin topa cu un situacion caotico.  Banda di 1:00 pm a cuminza busca mas personal pa bay eynan, incluyendo personal di Setar Cable Services.  Asina a kita tur e wayanan, luznan, y isolatornan di glas cu a cay kibra.  Tambe mester a kita e palo cu a cay riba un auto staciona dilanti apartamento.

   Ora cu tur e wayanan a ser kita, banda di 2:00 pm nan a pone tur area bek riba grid di coriente, excepto esnan bibando net eybanda, y esnan bibando na Nuñe.  Nan tin di warda te ora cu pone un palo nobo di luz, rek tur waya, keur esakinan, y despues pone coriente.  Elmar a calcula cu ta bay dura 4 ora, y loke tabata dificulta e situacion ta cu awacero tabata basha tin biaha.

   E trabaonan a bay toch basta acelera, a pone palo di luz, rek waya, y despues di a keur tur e instalacion, ya pa 5:10 pm por a pone coriente bek pa tur hende eybanda.  Tur esaki ta un trabao costoso cu sigur lo cay riba custia di Aseguro.