Accident pisa Diasabra anochi riba caminda di Piedra Plat

Persona coriendo zig-zag a ocasiona desgracia

ORANJESTAD (AAN): Diasabra anochi poco despues di 8:00 pm, habitantenan den area net dilanti di Compleho Deportivo Franklyn Bareño riba caminda grandi di Piedra Plat a tende un sonido fuerte di boksmento.

   Ora cu a bay check, a bin descubri e area tur gespat cu pieza di auto.  A bin topa cu dos auto compacto basta kibra riba e caminda.

   Banda panort di caminda, mas o menos dilanti cas Piedra Plat 15-D, a bin topa cu un auto compacto Nissan Note color blanco cu number A-81823, y banda pazuid di caminda un poco pabao di e banki publico pa hende sinta, tabatin un auto compacto Toyota Agya color preto cu number A-47095.

   Central di Polis a cuminza ricibi yamada di e accident aki, y mesora a dirigi patruyanan di Santa Cruz pa e luga.  Na mesun momento a pone Ambulance tambe na altura.

   Polis a yega y bin topa cu e autonan basta kibra, y mesora a compronde di testigonan cu ta trata di un accident unda a dal frontal riba otro.  Un testigo a hasta informa Polis, cu for di basta leu caba, prome cu Shiribana y Paradera e ta coriendo tras di e auto preto Toyota Agya cu tabata core zig-zag masha peligroso riba caminda.

   E Toyota Agya a keda core zig-zag y net yegando na e Compleho Deportivo aki, el a bay full na su man robez, y sin cu el a primi brake, el a bay dal cu tur su forza contra e Nissan Note cu tabata bin di direccion contrario.  Debi na e impacto, e Toyota Agya a bay den scual y a bira y finaliza bek direccion west.

   Ambulance a yega cu basta urgencia aki, y a nota mesora cu e chauffeur di e Toyota Agya ta basta mal herida, y aki a bin realiza cu e chauffeur su curpa ta pega den e auto.  E ora a core pidi Centro di Alarma pa manda Vehiculo di Rescate tambe.

   For di Tanki Flip e ora unidad di Bombero a mobiliza pa eynan, hunto cu Comandante OvD pa asina coordina e trabao.

   Bomberonan a yega y a analiza e situacion cu e dashboard y e firewall di motor, y asina a haci uzo di nan aparatonan pa crea espacio pa por libera e persona masculino cu a keda basta herida.  E chauffeur di e Nissan Note tambe a keda herida, y nan a hay’e y atende riba e banki banda di caminda.   Na final Ambulance a transporta cada uno e dos heridonan aki pa Hospital.  Polis tin e accident bao investigacion, y lo bay ta keda pendiente pa haya resultado di e nivel di alcohol den curpa di e chauffeur di e Toyota Agya preto.  Tur detaye cu el a acumula lo wordo uza pa e rapport final.

   Casi simultaneamente a socede como 20 meter mas pariba un otro accident den cadena e momento ey.  Encuanto e di dos accident por lesa awe tambe den DIARIO na otro pagina.