Accident basta serio riba caminda di Solito y cruzada di Katunastraat

ORANJESTAD (AAN): Dos unidad di Ambulance, como tambe personal di Vehiculo di Rescate di Cuerpo di Bombero a acudi Diahuebs anochi cu

urgencia riba caminda di Playa pa Tanki Leendert, net na e T-weg cu Katunastraat cu ta bay pa Ponton.

   Un auto sedan Hyundai Verna color cora cu number A-66164 moviendo for di banda di RCA Arena bayendo nort rumbo pa Tanki Leendert diripiente na e T-weg a hay’e sorprendi cu un auto compacto Chevrolet Aveo hatchback color oranje cu number A-20481 a sali su dilanti sin duna preferencia.

   Esaki a ocasiona un boksmento, unda e Chevrolet Aveo a draai rond 270º y a finaliza pabao di e caminda den e greppel, patras di e cas di Katunastraat 12-G.

   E Hyundai Verna debi na su movimento, a bay halto, bolter, y finaliza cu su cuatro wielnan den halto.

   Polisnan a yega y mesora a percura pa cera e pida caminda, y a pidi pa presencia di Ambulance y Bombero como cu tin dos hende herida, di cual uno ta parce di ta pega den auto.

   Esun cu no por a sali tabata den e Chevrolet Aveo, y Bomberonan a traha na forma diligente pa asina sak’e di e auto, y a pase pa Paramediconan, cu a bay cune rumbo pa Ambulance.

   Polis y compania di aseguro a cuminza cu e investigacion.