Abuso sexual entre dos mucha menor di edad trata den Corte

Homber di 30 aña acusa pa caso di 2010

A dura hopi aña prome cu caso a bin dilanti Huez 

ORANJESTAD (AAN): Diahuebs mainta Hues di Corte di Husticia a trata un interesante caso caminda un abuso sexual cu a sosode 14 aña pasa. Dos mucha menor di edad cu ta famia di otro, den wega di sunchimento a bay asina leu cu tabatin penetracion. E homber G. di 30 aña a presenta dilanti Hues, pa e caso penal cu Ministerio Publico a cuminsa contra dje.

  Cuatro aña promer cu caso a bay Corte: E acusacion cu Fiscal a presenta contra G. ta cu entre 2010 y 2013, el a abusa di su prima M. Durante tratamento di e caso, Hues a mustra cu na 2019 e tata di M. a haci denuncia y ta te 2023 a cuminsa cu investigacion caminda a interoga G.

   Hues a puntra Fiscal kico tabata e motibo cu e caso aki a keda tarda asina largo. Fiscal a bisa Hues cu e caso a keda na Hues Comisario y e no sa kico ta e motibo.

   Mucha a abusa di mucha: Hues a bisa cu Polis ta haya cu G. a abusa di su prima menor di edad. Segun G., esey no a sosode asina. Segun G., e mester a sosode na 2009 pasobra na December 2010, el a sali cu su mama for di e cas di su tata. Hues a bisa cu segun e mucha, e abuso mester a sosode promer cu December 2010.

   Wega a caba den abuso: Segun G., tur cos a cuminsa como wega entre G., M. y M. su ruman homber. Na dado momento G. lo a bisa su primo pa bay den camber y G. y M. a keda nan so. Nan tabata sunchi otro den wega. G. a sunchi M. na banda di cara. Segun G., te asina leu cu e ta corda, no tabatin penetracion. El a kita paña y keda na jockey y a drumi riba M. G. a bisa Hues cu e no ta corda cu M. tabata sunu. Hues a bisa G. cu el a atende hopi caso di abuso y no ta kere cu G. no ta corda nada. Hues a mustra cu M. a declara cu G. a bis’e pa kita su pañanan y pa nan haci un wega.

   Na dado momento M. a keda sunu. G. a bisa cu e no ta corda esey y e tabata den jockey pero no ta corda. G. a bisa Hues cu e tempo ey e tabata mucha y no ta corda cu tabatin penetracion. Hues a remarca cu como mucha e mester corda. G. a bisa cu e tin problema cu corda cos y tabata wordo trata pa epilepsia y ADHD. Hues a remarca cu eseynan no ta causa perdida di memoria. Hues a bisa cu e diferencia di aña entre G. y M. tabata casi 9 aña. G. a bisa cu e ta calcula cu e tempo ey e tabatin 15 aña. Esey kiermen cu G. mes tabata un menor di edad.

   Hues a bisa cu M. a declara na Polis cu e tempo ey e tabatin 7 of 8 aña y a wordo abusa door di G. El a bisa cu G. lo a bisa su primo pa bay na su camber y a bisa su prima M. pa kita su paña. Tur cos tabata un wega. Na dado momento G. lo a bay drumi riba M. y segun M., G. a penetr’e.

   Scol a bati alarma di abuso: Tempo M. tabatin 23 aña, e asunto aki a bin dilanti y a causa problema den famia. E scol na unda M. tabata bay, na dado momento a notifica e mama cu M. a wordo abusa door di su primo y si e mama no haci denuncia, e scol mes lo notifica autoridad. Ta asina cu for tempo cu M. tabata bay scol basico, docente a notifica e mama cu M. a wordo abusa pero e mama no a haci nada. Ta asina cu e tata di M., a rabia ora e asunto aki a sali na cla. El a hasta bay menaza G.

   Hues a puntra Fiscal cu mirando cu e abuso a tuma lugar tempo cu G. tabata menor di edad, si ta bay aplica castigo hubenil of no. Fiscal a bisa cu lo bay aplica castigo hubenil.

   Hues a puntra G. con a sigui cu tratamento. G. a bisa cu su 12 aña el a cuminsa bebe pilder pero a stop ora el a haci 18 aña, pasobra e pildernan no ta lag’e sinti bon. E cuestion di epilepsia, e no ta hayando pilder y ultimo biaha cu el a sufri epilepsia tabata 3 aña pasa.

   Fiscal a exigi castigo condicional: Fiscal a bisa cu den casonan di inmoralidad, ta hopi dificil pa presenta prueba. Hopi biaha ta declaracion di e victima contra e declaracion di e acusado. Mester busca prueba di sosten. Fiscal a bisa cu e tata di M. a haci denuncia. E mama a bisa cu den pasado tempo M. tabata na school basico, el a wordo informa door di docente cu M. a wordo abusa pero no a haci nada. Fiscal a sigui bsia cu M. a wordo scucha y el a bisa cu 1 biaha e abuso a sosode tempo e tabatin 7 pa 8 aña.

   Fiscal ta haya cu tin suficiente prueba cu na 2010, tempo G. tabatin 15 aña, el a abusa di M. cu tabatin 7 aña. Fiscal a mustra cu na Polis, G. a bisa cu tabata un wega. Fiscal ta haya cu si for di tempo cu e mama a haya sa, a haci denuncia, lo por a atende e caso mucho mas mihor. El a bisa cu basta tempo a pasa promer cu e caso aki a wordo trata. Sinembargo Fiscal ta haya cu mester duna castigo pero teniendo cuenta cu tur cos. Fiscal a exigi 1 luna di prison condicional cu 2 aña di prueba.

   Abogado: Abogado mr. Marchena a bisa Hues cu tur cos ta mustra cu tempo cu e abuso a sosode ta tempo cu G. tabata mucha. Abogado a cuestiona e hecho cu e caso aki a tarda asina hopi. El a mustra cu 4 aña y 6 luna despues cu e denuncia a wordo haci, a cuminsa cu investigacion, caminda G. a wordo scucha como sospechoso. Tur e tempo aki G. tabata bou presion si e ta wordo persigui y tabata wordo menaza pa su omo. Door di esaki tin un problema den famia cu ta afecta G.

   E abogado a bisa Hues cu e victima M. a bisa cu e ta considera e caso sera y no ta mira cu mester condena G. E abogado ta haya cu no tin prueba cu lo tabatin penetracion. E victima M. mes no ta bisa cu e lo a sinti dolor y no tin investigacion medico. E abogado a bisa cu tur esaki a sosode den wega. Na opinion di abogado, e hecho cu e mama no a bay haci denuncia e promer biaha, ta pasobra cu no tabatin indicacion di penetracion.

   E abogado a mustra cu segun website, ADHA ta causa cu hende no ta corda tur cos. E epilepsia tambe y e remedy cu e tabata bebe ta afecta su memoria. E abogado ta haya cu mester declara G. liber door cu no tin prueba. Tambe el a bisa pa declara Fiscal no admisibel pasobra a tarda cu e caso.

   Sentencia: Hues a sera tratamento di e caso y a bisa cu e ta bay evalua un rato si e ta dicta sentencia of no. Hues a bolbe y dicta sentencia. El a bisa cu e ta aplica ley hubenil. Hues a bisa cu e ta haya Fiscal admisibel. E hecho cu e caso a keda hopi tempo na Polis, no ta motibo pa bisa cu Fiscal ta no admisibel. Hues ta haya proba cu G. ta culpabel.

    Hues a bisa cu no tin splicacion cu desde 2019 e caso a keda drumi na Polis. El a bisa cu e no ta haya relevante cu mester duna castigo di prison pero cu mester duna castigo. Hues a confirma exigencia di Fiscal. El a condena G. na 1 luna di prison condicional cu un tempo di prueba di 2 aña.