Abogadonan no ta haya cu por prueba cu e dos hombernan ta envolvi den importacion di droga

ORANJESTAD (AAN):  Diabierna Fiscal a exigi 10 aña di prison pa e homber E.A. y 9 aña pa e homber J.S.O.

Fiscal ta haya cu nan ta complice den e importacion di 397 kilo di marihuana y 335 kilo di cocaina. E abogadonan mr. Paesch y mr. Canwood ta cuestiona e investigacionnan haci y ta haya cu mester declara E.A. y J.S.O. liber.

POLIS A SACA CONCLUSION INCORECTO

Abogado mr. Paesch di J.S.O. a bisa Hues cu J.S.O. ta admiti cu e tabatin mitar bloki di cocaina. E ta desmenti di tabata envolvi den e importacion di e lote grandi di droga. E abogado a bisa cu J.S.O. ta admiti cu el a yuda cu drechamento di e boto pero no tin nada di haci cu e importacion. Na opinion di mr. Paesch, J.S.O. a wordo pidi pa yuda drecha e boto cual lo a bay usa pa pisca. E abogado a bisa Hues cu e hecho cu Polis a haya un mitar bloki di cocaina na cas di J.S.O., no tin nada di haci cu e importacion di e lote grandi di cocaina.

   Na opinion di e abogado, Polis no a haya ningun combersacion di J.S.O. riba cocaina y armanan. E abogado ta haya cu Polis ta saca conclusionnan incorecto tocante e importacion di e lote di droga. E abogado ta haya cu tin speculacion incorecto cu J.S.O. lo ta un di esnan cu lo a huy na Eagle Beach. E abogado a bisa Hues cu J.S.O. tabatin un pia kibra y como tal no por a core. Ademas no tin prueba cu J.S.O. ta envolvi den e importacion di e lote grandi di droga y 3 revolver. Hues a bisa cu J.S.O. no ta wordo representa pa abogado mr. Paesch pa e caso di maltrato di su ex pareha. J.S.O. a bisa Hues cu e ta lamenta loke a sosode door di a bebe mucho hopi biña.

NO A HACI SUFICIENTE INVESTIGACION

   Abogado mr. Canwood a bisa Hues cu E.A. a admiti cu dia 3 October 2024, el a purba hiba 505,5 gram di cocaina laba den deken, Hulanda. E abogado a bisa cu E.A. a haya e droga for di Colombia. Na opinion di abogado, Polis no mester usa esaki pa bisa cu E.A. ta envolvi den e importacion di 8 Juni 2024. E abogado a remarca, kende ta bay warda un boto cu lo ta envolvi den traficacion di droga serca un tanta caminda tin camera di seguridad?! E abogado ta haya cu Polis a conclui cos robez. Na opinion di abogado, ta door di Inteligencia di Polis, ta pinta E.A. ta involvi den e importacion di droga.

   E abogado a remarca cu ta riparabel cu pasobra cu E.A. tin un SUV Toyota cu lo a core un caminda, ta conclui cu ta esey ta e auto envolvi den importacion. E abogado ta haya cu Polis no a haci mas investigacion pa determina si di berdad ta e auto di E.A. ta esun envolvi.

   E abogado a mustra Hues cu E.A. tin un caso di 14 aña pasa cu el a wordo condena y y no por bisa cu e ta envolvi. Tin declaracion di e homber I. cu a wordo deteni ora a intercepta e boto. E homber I. a bisa cu E.A. lo ta envolvi. E abogado no ta kere declaracion di I. E ta haya cu I. kier tira e culpa riba otro. Mr. Canwood ta haya cu e investigacion no ta completo pa acusa E.A. di complice. E abogado ta haya cu mester declara E.A liber di e importacion di lote grandi di droga. El a bisa Hues cu e ta haya e exigencia di Fiscal exagera.

Hues a sera tratamento di e caso y a bisa cu dia 30 Maart 2026 lo tin sentencia.