The content originally appeared on:
Diario
Minister Ursell Arends:
*Decreto Ministerial riba reglamento y permiso ta na vigor for di 1 September caba
ORANJESTAD (AAN) — Minister di Transporte, Naturaleza, Integridad y Asunto di Adulto Mayor, Ursell Arends, a duna di conoce den entrevista cu DIARIO, cu Decreto Ministerial riba reglamento y permisonan di taxista, a drenta na vigor entrante 1 di September caba.
E dignatario a menciona cu tabata tin e prome MB cu ta regarda traspaso, a bin e di dos MB den cual ta clarifica tur incertidumbre cu tabata existi cerca e taxistanan. Tur esaki a keda aclarea na e momentonan aki, segun e mandatario a indica. A duna nan perspectiva, kico ta e stapnan cu e ta bay tuma, unda cu tur peticion cu drenta pa traspaso ta bay tin un comision independiente, cu lo evalua esaki.
Minister Arends a informa cu e Comision lo consisti di cinco persona, den cual e taxistanan mes lo tin dos asiento den dje, y na final lo bay wak si e decisionnan cu e minister ta tuma ta razonable pa nenga of aproba un traspaso di permiso.
“Fuera di esaki tambe den e MB nos a duna clarificacion, cu ora un ‘vergunninghouder’ no por eherce e tarea mas di ta un taxista, e lo haya un ‘hulpchauffeur’, pa e duracion cu e vergunning ta valido.
Pues, mi ta kere cu awo cu e discusionnan ta tras di lomba, nos por bay bek na mesa pa cuminza papia riba e preocupacionnan cu ta valido, entre otro: pension, taxi meter, prijs cu nos tin cu papia cu nan aworaki, p’asina aki yega na solucionnan concreto con nos ta bay move padilanti, pa atende cu preocupacionnan cu ta real”, Minister Ursell Arends a remarca.
E mandatario a reitera cu enfasis cu e vergunning no ta eigendom di e taxistanan. “Esaki ta loke ta wordo señala, y nos a splica nan tambe cu e vergunning ta keda di gobierno; den termino legal ta wordo categoriza como un vergunning scars, no tin hopi di nan, e ta limita na cierto cantidad y nos mester garantiza oportunidad igual pa tur hende den nos comunidad y tambe cu e sistema aki ta uno husto”, Minister Arends a remarca.
E dignatario a señala cu awo e ta cla pa bay discuti riba temanan importante manera esun di pensioen, y tambe con nan ta bay move p’asina organiza henter e structura aki di un miho manera.
Arends a señala cu e no ta cambiando ningun ley den e MBnan; e ley ta prescribi claramente kico minister por haci. Diabierna ultimo, Parlamento a haya un carta, e MB y tur e documentonan relevante cu e MB y tambe a informa Parlamento cu nan ta trahando riba cambionan di ley necesario, y un bez cu e proceso ta cla e por cana su caminda normal, y ta yega Parlamento pa e votacion necesario tuma lugar, si ta cambia e ley of no.
El a menciona cu e mesun abogadonan di e taxistanan a sali pafo bisa cu e minister ta actuando conforme ley. “Mi sa cu tin un grupo cu no ta contento pasobra abogado no ta bisa loke nan kier scucha, pero e maneho cu mi ta hibando ta conforme e ley”, e dignatario a reitera.
