Abogadonan a exigi pa Hues declara Ministerio Publico no admisible den caso Flamingo

Na comienso di tratamento di e caso penal

ORANJESTAD (AAN): Dialuna mainta den Corte di Husticia, a cuminsa cu tratamento di e caso penal Flamingo den cual tin 6 sospechoso. E sospechosonan ta: Otmar Oduber, Eisia Esser, Richinella Wever Croes, Jeandrick Oduber, yiu di Otmar, Laurence Phillips y Gilberto Tiel. Ta asina cu Tiel no a presenta.

   Hues no di Aruba ta atende caso: Ta asina cu un Hues, no di Aruba, ta atendiendo e caso. Esaki ta un procedura normal cu Corte di Husticia di Antiyas ta hiba.

   Ora ta trata di un caso penal caminda tin ex minister, minister of politico envolvi, ta laga un Hues di un otro pais bin atende e caso. Esaki ta pa mustra e imparcialidad di Corte di Husticia pa evita cu lo por tin insinuacionnan cu e Hues lo ta partidario.

   Abogadonan e exigi pa declara fiscal no admisible: Ta asina cu tur e abogadonan a uni cu mr. Carlo den su reclamo pa declara e dos Fiscalnan di Ministerio Publico cu ta atende caso Flamingo, no admisibel.

   Abogado mr. Carlo, cu ta representa Otmar Oduber a cuminsa bisa Hues cu Ministerio Publico a a viola diferente normanan den caso Flamingo. E abogado ta haya cu e agentenan cu a haci investigacion a viola normanan y causa cu a tacha e proceso husto di caso pa Otmar. Haya cu intencional Fiscal a actua den viola normanan y pesey mester declara Fiscal no admisibel.  Dia 24 Juni 2020 a haci investigacion na diferente casnan y lugarnan relaciona cu caso penal Flamingo contra Otmar.

   Ta sospecha Otmar di 7 delito. E abogado a bisa cu dia 10 Mei 2022, riba invitacion LandsRecherche, Otmar a bay pa interogacion y a worde deteni. Segun abogado, despues di 2 aña ta haya sa cu a base di 8 informacion cu (Bureau Criminele Informatie) BCI a haya a cuminsa e investigacion. E abogado a señala cu durante interogacion ta mustra cu ta for di un otro angulo ta interogando Otmar.

   Cuestiona Ministerio Publico: Na opinion di mr. Carlo, intencional Hues Comisario a prolonga detencion di Otmar. Notable ta cu e mesun Hues Comisario cu a atende e prolongacion, ta esun cu a aproba e investigacion na casnan y lugarnan. E abogado ta haya cu ta un otro Hues Comisario mester a evalua e prolongacion y e ta sigur cu lo no a bay over pa prolongacion. E abogado a bisa Hues cu tur cos ta mustra cu ta rond e denuncia di Marisol Tromp relaciona cu situacion na Serlimar, a persigui Otmar.

   Segun e abogado, 10 luna despues di cu a cuminsa e investigacion, Marisol a haci denuncia. Di tur e acusacionnan di BCI, a keda solamente 3 acusacion a base di otro agrumento cu e denuncianan BCI. Ningun dia Otmar a worde confronta cu e denuncianan di BCI y Servicio di Inteligencia. mr. Carlo a mustra cu na 2023, 6 biaha a manda pidi Ministerio Publico, si tin pensa cuminsa un caso penal contra Otmar.

   Na Juni 2023, Fiscal a notifica cu lo persigui Otmar pero riba otro sospecho cu tabata relaciona cu investigacionnan na lugarnan. Na September 2023, Ministerio Publico a laga sa cu ta cuminsa un caso penal. Ta asina cu mr. Carlo a cuminsa un caso contra e acusacionnan y Hof a rechaza esaki.

   Persecusion politico: mr. Carlo a bisa Hues cu e agentenan di BCI a faya di verifica e denuncianan si nan ta real of si ta un forma di perhudica Otmar. E abogado ta haya cu Fiscal tambe a faya den esaki. E abogado ta sospecha cu aki ta persecusion politico a tuma lugar pa perhudica Otmar. El a bisa cu a base di informacionnan falso, Ministerio Publico a cuminsa un caso contra Otmar.

E abogado a señala cu durante tratamento di e prolongacion di detencion di Otmar, Fiscal intencionalmente a gaña Hues Comisario pa hustifica e prolongacion di detencion. E abogado ta haya cu Hues mester declara Ministerio Publico no admisibel den caso Flamingo.

   Na opinion di mr. Calor, e forma con Marisol Tromp a haci denuncia, ta bisa con e forma di LandsRecherche ta traha. No ta Marisol mes a bay haci denuncia sino ta LandsRecherche a bis’e pa pasa na LandsRecherche y e ora ey el a haci denuncia, riba instruccion di LandsRecherche. E abogado a mustra cu e denuncia di Otmar contra Marisol a worde rechaza door di Hof. El a señala cu Marisol a bisa cu el a tende di 2 persona encuanto Otmar. E abogado ta haya cu aki tambe Ministerio Publico a faya y mester declara Fiscal no admisible.

   Fishing expedition pa colga Otmar: mr. Carlo a bisa Hues cu e ta haya cu Ministerio Publico a cuminsa un fishing expedition pa asina todo por todo colga Otmar. E abogado ta haya cu esaki ta violacion di normanan cu mester conduci cu ta declara Ministerio Publico no admisibel den caso Flamingo. El a cuestiona e forma con LandsRecherche tabata interoga Otmar, caminda ta laga puntonan importante un banda pa asina incrimina Otmar. E abogado ta haya cu innececesariamente a tarda 4 aña cu e caso caminda no a y no lo por mas scucha un testigo importante ya cu el a fayece. E abogado ta di opinion cu e pruebanan den e caso aki ta haya inhusto y como tal no por worde usa.

   Abogadonan ta cuestiona: mr. D.Croes cu ta representa Esser tambe a bisa cu e ta haya cu aki ta persecusion politico a tuma lugar. Oponentenan politico ta busca forma pa caba cu su cliente. E abogado a bisa cu Esser tabata yuda Otmar hopi y ta haya cu aki tambe tin violacion di normanan.

Odor cu ta representa Richinella, ta haya cu Fiscal a viola norma door cu su cliente a sigui ordennan di Otmar y no a haci nada malo.
Yarzagaray cu ta representa Phillips, a bisa Hues cu tin violacion di normanan contra su cliente. E ta haya cu Marisol Tromp a bay pinta su cliente scur. El a bisa cu lamentablemente esey ta e mal costumber den politiconan.

Mr. Yarzagaray ta haya cu Marisol a haci denuncia falso y laat contra Phillips. Esey ta violacion di norma hopi serio. Esey ta trece cune cu Ministerio Publico mester worde declara no admisibel. E abogado ta haya cu Ministerio Publico. a laga su mes worde usa door di Marisol of Ministerio Publico y LandsRecherche a usa Marisol pa persigui Phillips.

   Hues despues di a scucha e reaccion di Fisalnan di abogadonan y, a sera tratamento di e protesta contra Fiscal. Hues a bisa cu e ta bay studia e caso y Diaranzon 20 November pa 8.30 di mainta lo e dicta sentencia.