A keda confirma cu Aruba lo conoce un Gabinete nobo “AVP-FUTURO” entrante Diabierna awo

Señora Gerlien Croes y señor Mike Eman:

ORANJESTAD (AAN) – Señora Gerlien Croes, hunto cu señor Mike Eman como formador y informado, den e proceso di formacion  di un gobierno nobo pa e periodo 2025-2029, a confirma pa prensa cu e ronda di informacion pa un Gabinete pa Aruba a wordo finaliza.

“Entrante diabierna 28 di maart, Aruba lo conoce un gobierno nobo. Y nos ta hopi contento con e proceso a encamina, cu e combersacionnan cu nos tabata tin awe cu Gobernador. Gobernador a ricibi for di nos e acuerdo pa locual ta e programa di gobernacion”, Gerlien Croes a splica.

El a bisa cu e reparticion di e ministerionan nan a palabra tur lo necesario di e proceso y asina nan a finaliza lo necesario pa por bisa Aruba cu, finalmente, tin un Gabinete nobo. Seguidamente Croes a pasa palabra pa Prome Minister entrante, señor Mike Eman, ken a menciona e ministernan cu lo compañe den e Gabinete nobo.

Señor Mike Eman a expresa cu nan tin un ekipo di ministernan bastante fuerte, cu tanto sentido di innovacion y renovacion cu Aruba ta desea, algo cu ta profila hopi cerca Partido Futuro, y cerca Partido AVP tin un linea hopi fuerte cu e sentimentonan cu tin den nos pais, cu mester haci algo cu pobreza y cu e poder di compra di nos comunidad.

“Nos ta sinti cu e dos pensamentonan aki di renovacion, innovacion, lo hiba Aruba den otro plano y tambe un generacion nobo ta fuertemente representa den e programa di gobernacion, y tambe e tema di con nos ta bay percura pa esnan di menos recurso den nos pais, y con nos ta bay evita mas pobreza y cuminza saca nos hendenan for di situacionnan dificil, con nos ta bay crea vivienda bon pa nos hendenan, y tur esaki, naturalmente, den cuadro di bon relacionnan”, e dignatario a señala.

El a agrega cu su gobierno ta bay lanta un Ministerio di Relacionnan di Reino, e biaha aki. “Anteriormente, e tabata cay bao Algemene Zaken, awo e ta bira un ministerio riba su mes, cu por bay specializa. Mi tabata tin e honor ora mi tabata Minister Presidente anteriormente, di a crea un departamento cu tabata haci esaki, pero lamentablemente, esey no a continua e ultimo tempo, pero awo nos ta haci un stap mas leu, awo ta haya un ministerio”, Eman a indica.

Premier Eman a expresa cu e tin pleno confianza cu e gobierno aki tin e talentonan, y tin esnan cu kier dedica nan mes na sirbi e pais. E mandatario e expresa cu esaki ta Gabinete AVP-FUTURO.