A bati alarma ora landado a haya problema den lama na Arashi

ORANJESTAD (AAN): Aña nobo atardi, tanto Polis y despues a Ambulance a worde pidi na Arashi beach,

unda cu e prome informe ta indica cu un persona posibelmente a hoga.

   Centro di Alarma na su turno a cuminsa manda Ambulance pa e lugar, y a haya informacion cu un ex-funcionario di Polis y su casa kende ta nurse, ta practicando CPR caba riba e homber pa asina trata di reanima e persona.

   Personanan eybanda a indica cu e persona den lama ta un bishitante, y cu posiblemente el a sufri di un atake di epilepsia ora cu e ta den lama.

   Ambulance a yega, y mesora Paramediconan a tuma e trabao di CPR over, y a pone aparato di ECG pa monitor curazon di e victima.  A compronde cu despues di algun rato a logra haya pulso.

   Esaki ta suficiente indicacion cu e por wordo stabiliza, y a dicidi pa bay cune mesora rumbo pa Servicio di Emergencia na Hospital, pa tratamento medico mas avansa.

   Autoridad ta calcula cu e homber ta den 60+ di edad, debi cu no tin identificacion y tampoco hende eynan cu conoce bon.