MEP ta exigi claridad di Gobierno riba registro obligatorio di Airbnb sin base legal

Nan ta conseha ningun hende registra

ORANJESTAD (AAN): Fraccion di MEP a dirigi preguntanan na e ministernan responsabel pa e registro obligatorio di tur cas di Vacation Rentals y Airbnb na Aruba. Esaki despues cu 3 minister hunto a anuncia un areglo obligatorio pa ciudadanonan bay registra. MEP ta exigi claridad riba e base legal di e obligacion aki, e competencia di cada minister y e consecuencia pa doñonan cu ya tin nan permiso na ordo. Ademas tin duda real cual di e ministernan aki ta responsabel pa e tema aki.

   Ademas, MEP kier sa con Gobierno lo proteha e datonan personal di doñonan, ken lo tin acceso na e informacion y cua garantia lo preveni mal uzo, publicacion ilegal of uzo di e datonan pa otro proposito, por ehempel pa campaña politico.

  MEP ta cuestiona tambe e decision pa exclui doñonan cu no registra for di legalisacion of un posibel areglo temporal, sin cu e base legal ta cla.

   MEP ta enfatisa cu claridad y orden den sector di Vacation Rentals y Airbnb ta importante, y no ta recomenda ningun hende pa registra tanten cu no tin un cuadro legal regla. Gobierno tambe mester actua dentro di cuadro ley, respeta privacidad y garantisa protection legal pa tur ciudadano.