Dialuna awor Corte Superior ta trata apelacion di Nelson de Andrande contra su castigo

E tin un condena di 18 luna di prizon di cual 8 luna ta condicional

ORANJESTAD (AAN): Dialuna awor, Nelson (Speed) de Andrade mester presenta den Corte pa e apelacion cu el a haci contra su sentencia di 18 December 2024, caminda Hues a condena Speed na 18 luna di prizon di cual 12 luna ta condicional cu un tempo di prueba di 3 aña.

   Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa e mesun delito cu el a yega di haci den pasado.

   A viola secreto di Polis: Durante tratamento di e caso na 2024 contra 4 periodista, Fiscal a bisa cu e ta haya nan culpable di a viola secreto di Polis. Fiscal a expresa cu periodistanan mester atene nan mes na norma, etica periodistico y ley den un comunidad. Fiscal ta haya cu aki den forma structural a bay scucha radio di polis.

   Fiscal a exigi 2 aña di prizon pa Speed y a exigi pa detencion di biaha ora Hues dicta sentencia. Fiscal a exigi 18 luna di prizon di cual 8 luna ta condicional pa Giel y Laclé y cu 3 aña di prueba. Fiscal a exigi 6 luna di prizon condicional pa Koolman cu 3 aña di prueba.

   A cumpra Polis di fam Vos: Dia 18 December 2024, Hues a dicta sentencia caminda Hues a bisa cu Speed, Giel y Lacle ta culpable di a cumpra e agente di Polis, Vos. Hues ta haya proba cu Speed, Giel y Lacle a paga Vos. Cada un a haci’e na nan manera. Hues a bisa cu e ta haya e declaracion di Vos confiabel.

   Na opinion di Hues, no ta esey so!. E declaracion di Vos, ta wordo confirma door di e chatnan riba WhatsApp. Tin prestamo di placa haci y a duna regalo, pa asina move Vos como ambtenaar haci cosnan cu ta contra di su obligacion como agente di Polis.

   A viola obligacion di Vos: Hues ta haya tur cuater periodista culpable cu Vos a viola su obligacion di comparti informacionnan secreto di Polis. Hues a bisa cu Vos no a haci’e su so.

   E acusadonan a yuda door di duna diferente laptop, facilita aparato Wi-Fi, instalacion di cierto Apps pa asina haya tur informacion for di radio di Polis. Hues ta haya cu cada un a haci aporte significante den esaki.

   No por haci delito pa haya informacion: Hues a bisa cu pa cu e acusacion di organizacion criminal, no tin suficiente prueba di trahamento structural pa por papia di organizacion criminal. Pesey ta declara e periodistanan liber.

   Hues a reacciona riba defensa di abogado, cu mester tene cuenta cu libertad di prensa. Hues a bisa cu en principio mester respeta esaki pa democracia den un pais. Sinembargo, e limite di libertad di prensa ta wordo determina pa ley.

   Hues a enfatisa cu un periodista no por haci delito pa haya informacion. Hues ta haya cu esaki a sosode den e caso aki. El a bisa cu solamente den caso excepcional por tin excepcion.

   Pa cu e castigo, Hues a bisa cu e ta tene cuenta cu seriedad di e caso. E ta haya cu aki ta trata di un caso serio caminda a causa cu Vos a viola su obligacion y daña imagen di Polis. Esaki a crea duda den Polis door cu informacion secreto di Polis ta cay den man di e acusadonan. Hues ta haya cu esaki por causa peliger den comunidad.

   Hues a tuma e acusadonan na malo cu door di sensacion y nan propio interes a haci esaki.

   Castigo combina: Hues a bisa cu e ta castiga e acusadonan menos cu Fiscal a exigi, pasobra e no ta haya proba e organizacion criminal. Hues a condena Lacle y Giel na 240 ora di trabao pa comunidad y si no cumpli cu esaki, lo mester bay 120 dia sera den KIA.

   Tambe Hues a condena Lacle y Giel na 12 luna di prizon condicional cu 3 aña di prueba. Esey ta nifica cu si den e periodo di 3 aña nan haci algo contra ley, nan lo por haya e 12 luna di prizon riba e castigo cu nan lo haya pa e delito cu nan a haci. Hues a condena Koolman na 150 ora di trabao pa comunidad y si e no cumpli cu esaki, e lo mester bay sera 75 dia di prizon. Tambe un castigo condicional di 3 luna di prizon cu 3 aña di prueba.

   Speed a bolbe haci mesun delito: Hues a condena Speed na 18 luna di prizon di cual 12 luna ta condicional cu un tempo di prueba di 3 aña. Esey ta nifica cu Speed mester bay 6 luna sera den KIA. Hues a bisa cu Speed a haya mas castigo pasobra Speed a haci e delito aki den su tempo di prueba pa e mesun delito aki cu el a yega di haci den pasado.

   Ta asina cu Speed a apela e sentencia y Dialuna awor 26 October 2026 pa 2’or di merdia, tratamento di e apelacion ta tuma lugar.