Cantidad di website importante rond mundo a stop di funciona Diaranson

Na Aruba tambe

ORANJESTAD (AAN): Un alerta grave riba vulnerabilidadnan den e lenguahe di programacion PHP a pone cu riba Diaranson a desconecta for di Internet un serie di website importante di Hulanda, demas paisnan di Europa.  Entre otro nan a desconecta DigiD, website di MijnOverheid, y website di varios Hospital no tabata accesibel.

   Tambe Tweede Kamer y e Nationaal Cyber Security Centrum (NCSC) ta wordo nombra entre e organizacionnan cu a wordo afecta.

   E problemanan a afecta varios aspecto di e bida di tur dia.  Ademas di e servicionan di Gobierno y di Salubridad Publico, tambe e websitenan di varios compania di transporte publico, diferente club di futbol, y e plataforma di tecnologia Tweakers no por a wordo localiza.

   E websitenan aki como cautela a wordo poni offline despues di e alertanan.  Esey no nifica cu tur e organizacionnan aki a bira victima di cyberattack.

   Autoridadnan di Cybersafety na Union Europeo ta esnan cu a bati alarma Diaranson mainta riba 2 vulnerabilidad critico y e posibel consecuencianan.  Tambe experto y companianan cu ta host websites, a core notifica doñonan di website den forma urgente.  E hecho cu e idioma di PHP ta wordo uza ampliamente, ta algo preocupante.  Pasobra e idioma di programa aki ta forma un parti importante di e tecnica pa un gran parti di Internet.

   Websites di Aruba:  Pa prevencion, webmasters di diferente portal na Aruba tambe a core bay offline pa evita cualkier problema.  Riba Diaranson mainta y merdia, no por a drenta den e website di Gobierno.aw tampoco.  Riba e potret aki por mira e mensahe cu bo ta haya ora di bay riba Gobierno.aw y otronan.

   Demas websites na Aruba cu a bay offline tabata Dow.aw, Arubachamber.org, Airportaruba.com, Elmar.aw, VNOAruba, Parlamento.aw pero den oranan di atardi algun di nan a bin bek caba.

   Como 70 porciento di websitenan ta haci uzo di PHP.  E idioma di programa aki ta existi desde decada di 1990, y ta wordo uza e.o. door di Facebook, Wikipedia, WordPress, y diferente website di Gobierno.  Pesey un problema den siguridad di PHP por tin consecuencia pa hopi diferente organizacion y usuarionan.

   Pa e webmasters, nan tin di warda riba un security update cu a wordo anuncia pa PHP, y cu lo mester ta wordo distribui banda di Diaranson merdia.

   Con grandi e impacto ta bira, ainda no ta conoci.  E uzo amplio di PHP ta haci e riesgo di un cyberatake hopi grandi, principalmente na Hulanda, paisnan di Europa, y tambe na Aruba.