“Ciudadano no por paga e prijs pa limitacionnan di sistema di gobierno”

Parlamentario di AVP, ing. Carlos Bermudez:

*Mester revisa y coregi posibel multanan inhusto di DIMP 

ORANJESTAD (AAN): Parlamentario di AVP, ing. Carlos Bermudez, a dirigi preguntanan oficial na Minister Geoffrey Wever tocante multanan di impuesto di vehiculo cu posiblemente a duna ciudadanonan cu a haci nan pago riba e fecha final anuncia pa gobierno.

Bermudez ta pidi pa investiga si procesamento bancario of administrativo a causa cu pagonan haci na tempo a wordo registra como pago laat.

Gobierno a anuncia oficialmente cu 2 di februari 2026 tabata e ultimo dia pa paga impuesto di vehiculo pa e prome mita di 2026. Departamento di Impuesto (DIMP) ta ofrece ciudadano e posibilidad pa paga via Online Banking y despues solicita su recibo online.

Bermudez ta presenta un situacion concreto: un ciudadano ta paga via banco riba 2 di februari y, e mesun dia, ta solicita su recibo via Decos Join, incluyendo un comprobante bancario cu ta mustra e fecha di pago.

Sinembargo, despues e ciudadano ta ricibi un multa pasobra den e sistema di DIMP e pago ta aparece como ricibi despues di e fecha final.

“E pregunta ta simpel: si gobierno ta bisa cu e ultimo dia pa paga ta 2 di februari, y ciudadano por comproba cu el a paga dia 2 di februari, con nos por castiga e ciudadano como si fuera el a paga laat?”, Bermudez ta cuestiona.

Prueba di Pago

DIMP a indica cu pagonan via Aruba Bank, Banco di Caribe y CMB, haciendo uzo di “Bill Payment”, ta wordo procesa den un dia. Tambe a comunica cu pagonan haci riba 2 di februari despues di e ora di cierre di banco ta pasa pa e siguiente dia y ta wordo considera laat.

Pa Bermudez, ta precisamente e diferencia entre e fecha cu ciudadano ta haci su pago y e fecha cu e pago ta wordo procesa of registra loke mester wordo evalua. E ta considera cu ciudadano no mester carga cu consecuencianan di procesamento bancario of administrativo sin cu su comprobante di pago haya debido consideracion.

“Tecnologia y administracion ta existi pa sirbi ciudadano, no pa castiga ciudadano cu por demostra cu el a cumpli cu su obligacion riba e fecha cu gobierno mes a stipula”, e parlamentario ta enfatisa.

Revision

Bermudez ta solicita pa e minister laga investiga cuanto ciudadano durante 2026 a ricibi un multa pa supuesto pago laat di impuesto di vehiculo. E ta pidi un comparacion entre e datonan di DIMP, e peticionnan pa recibo entrega via Decos Join y e comprobantenan bancario suministra door di ciudadanonan.

Concretamente, e ta propone pa identifica e numbernan di auto cu a ricibi multa, verifica e fecha di e peticion pa recibo y compara esaki cu e fecha indica riba e comprobante bancario. E revision aki mester determina cuanto ciudadano a haci su pago riba 2 di februari 2026, pero toch a wordo registra como cu nan a paga laat.

Pa e parlamentario, e asunto no mester keda limita na un caso individual. Si tin mas ciudadano afecta pa e mesun situacion, nan tambe mester wordo identifica pa e revision por atende tur caso relevante.

Coreccion

Si e investigacion demostra cu ciudadano a paga na tempo pero a ricibi multa pa motibo di procesamento bancario of administrativo, Bermudez ta considera cu gobierno mester coregi e situacion. Multanan impone inhustamente mester wordo retira. Den casonan caminda e multa ya a wordo paga, e ta pidi pa investiga e posibilidad di restitucion of compensacion cu un saldo habri.

Bermudez a puntra e minister tambe si e ta dispuesto pa instrui DIMP pa revisa y, si ta necesario, adapta su sistema di control pa evita cu situacionnan similar sigui ripiti.

“Si un ciudadano paga laat, e lo tin cu paga multa. Pero paga multa mientras el a paga na tempo no ta aceptabel. Esaki ta trata di trato husto pa tur ciudadano.

Ciudadano no por paga e prijs pa limitacionnan tecnico of administrativo di gobierno”, Bermudez ta conclui.