Dama a pone presion pa su yiu saca Motorcycle horta for di mondi

ORANJESTAD (AAN): Un caso cu e siman aki a bira conoci, a demostra cu hobennan ta comete fechoria,

pero danki Dios cu nan tin mayornan cu si ta responsabel, nan sa asumi nan rol den educacion corecto di yiunan, y ta actua pa coregi tur cos.

   E siman aki tur cos a start, ora cu un video a circula riba Social Media na Aruba.  Esaki tin di haber cu ladronicia di un motorcycle den pueblo di Bubali.  Ladronnan ta comete ladronicia, lubidando cu awendia ta casi tur cas tin Security Camera cu ta capta tur cos den bon resolucion di imagen.  Fuera di esey na varios caminda rond di Aruba, Polis tin camera tambe instala.

   A sali na cla, cu e motorcycle modelo AKT.  E marca aki ta uno fabrica na Colombia.  Tin security video unda bo ta mira tres persona cu cara “full tapa” ta subi tereno.

   E video aki a wordo poni riba Social Media, y el a cuminza circula.  Door di e video cu a bay rond, tabatin hopi hende cu a mira tur detaye, y facilmente a reconoce e “ladronnan” aki, debi cu nan tin cierto tatuahe na nan curpa.  Tambe a mira uno cu un jacket cu tabata mustra conoci.

   E video a plama, y pa colmo e mayor di un di tres individuonan a mira e video, y facilmente el a reconoce cu lo ta trata di su yiu menor di edad (posibelmente di 15 aña).  Pues mientras cu e mayor ta pensa cu su yiu ta den camber drumi, den marduga e lo ta bula bentana sali y bay busca fechoria pa haci, y bay horta cu otro dos amigo.  Despues nan a bay scond’e den mondi.

   E señora a dicidi na haci lo corecto, y mesora el a pone presion riba su yiu pa e saca e Motorcycle bek for di mondi, prome cu denuncia oficial wordo haci.

   Y asina riba Diaranson anochi e grupo di menor di edad aki a bay saca e Motorcycle, cu no tabata mucho leu di nan cas scondi den mondi.

    Diaranson den oranan di anochi polis a bay Bushiri pa atende e caso.  Doño di e Motorcycle a ser contacta door di e Mama di e mucha y asina hunto cu polis a resolve e caso.  Polis tambe a papia severamente cu e muchanan riba locual a pasa, y ki consecuencia e caso lo por tabatin riba nan mes, riba nan nomber, y nan futuro pa hasta haya trabao.

   E momento ey si miedo di bay encarcela a drenta curpa. Pero, debi cu keho oficialmente no a wordo entrega, Polis no por a detene ningun di nan.

   E mester ta un bon les pa nan haya sa con un acto lo por perhudica nan bida.  Ban spera cu nan no bay haci'e atrobe. Di otro banda, no ta conoci tampoco si ya nan a yega di comete ladronicia caba.

   DIARIO a tapa cara di e hobennan debi cu nan ta menor di edad.

   Na Pagina 7 tin un otro informacion relaciona cu e trio aki, esta cu nan lo a uza un Pickup horta pa a horta e motorcycle na Bubali.