“Cada turista cu bin Aruba, si e trece $1000, e ta costa Aruba $1300”

Segun comerciante Marjorie Vermeer-Luidens:

ORANJESTAD (AAN): Aruba ta rico, pero nos ta pober den tempo, nos ta pober den e amor humano. Nos no tin tempo ni pa bishita nos mama. Placa ta cumpra tur cos, pero con nos ta cumpra consenshi? Esaki tabata palabranan di comerciante Marjorie Vermeer-Luidens den un entrevista cu DIARIO. 

Segun e, turismo ta haci un efecto hopi grandi den esaki. Hotelnan ta ofrece pago di hasta tres biaha riba dia liber di trahadornan. Aruba mester tin un gobierno cu tin e weso di lomba pa tuma decision den e fase cu Aruba ta den di ‘over tourism’ y populacion. 

E ta cuestiona e hecho cu e hotel Ibero ta bin cu dos hotel mas y nan ta bin cu nan mesun hendenan pa traha, contribuyendo na mas hende pa Aruba carga. “Aruba no ta crece”, el a expresa. 

El a remarca cu si bin un boluntad general na unda tur ciudadano ta dicidi pa stop di traha e cabida pa mas turismo bin nos isla y drecha e producto Aruba prome. Segun e, cada turista cu bin Aruba, si e trece $1000, e ta costa Aruba $1300. “Esaki no ta un ‘toevoeging, e ta un gasto pa nos. Nan ta uza nos cayanan, nos careteranan mientras ya no tin caminda di pone auto”, el a enfatisa. 

Tambe, el a menciona cu hotelnan tampoco ta bin cu un opvang gratis unda mamanan por laga nan yiunan den tur siguridad mientras nan ta traha. Y hopi di e muchanan aki, ta keda cas nan so despues di scol. Muchanan muhe di 12 aña ta sali na estado. Segun e, esakinan ta algun reto cu mayornan ta enfrenta. 

“Unda e gobierno ta nace cu forsa di boluntad pa bisa cu e prome plan riba mesa ta stop cu mas turista. Mi no ta bisa pa stop cu turismo. Mi ta bisa pa stop cu mas turista”, el a expresa. 

El a menciona cu den combersacion cu señora Ronella Croes di ATA, el a wordo indica cu ATA ta bendiendo Aruba diferente. E idea ta pa cambia Aruba pa ‘Less is more’. Cu esaki, señora Vermeer-Luidens a splica cu e ‘more’ ta e amalidad di nos hendenan y no e cantidad. El a enfatisa cu Aruba no mester di mas autonan cu ta daña nos naturalesa tampoco mas fiesta, pero menos. Menos turista pa uza e autonan aki. 

Esaki ta e trankilidad cu e turista ta buscando y ta asina Aruba ta wordo bendi. Pero nada lo cambia di un dia pa otro, segun Vermeer-Luidens. “E cuestion ta awe mi kier pa tur gobierno na mando pa bin cu plan uno di con pa maneha e tsunami cu ta cabando cu nos pueblo”, el a remarca.