Mester inverti mas placa pa haci acera y cayanan apto pa esnan cu ta uza rolstoel y Adultonan mayor

Minister di Infrastructura, Energia y Telecomunicacion,  Dhr. Rene Herdé

ORANJESTAD (AAN): Den un entrevista cu DIARIO, Minister di Infrastructura, Energia y Telecomunicacion,  Dhr. Rene Herdé a indica cu en berdad tin hopi keho cu camindanan no ta apto pa esnan cu ta haci uso di rolstoel y pa Adultonan  Mayor. E problemanan aki wordo delibera den reunionnan cu DOW.     

E minister a splica cu di tempo cu a drecha Caya Grandi na Playa , a cuminsa tene cuenta cu e necesidadnan aki, manera a cuminsa pone e bahadanan di acera, pero e no ta den e sistema di traha, kiermen esaki no ta integra ainda. Tin hopi cos cu mester tene na cuenta, na momento di implementa e cambionan aki, manera hanchura y e tipo material cu mester wordo uza riba acera, como tambe e posibilidad di baha y di un acera y cruza caya subi otro. Esaki mester wordo inclui den e sistema na momento cu ta bay traha un caya.

Minister a bisa cu na momento cu ta trata di diseña un caya, mester tene cuenta cu e acera, e bahada, e subida y ora den caso di yobida, pa awa no keda para eynan. Esaki ta algo cu e departamento tecnico di DOW ta traha cu ne.

Minister Herdé a indica cu esaki tambe tin su gastonan extra. El a bisa cu djis pa basha asfalt ta costa hopi placa, y awo si mester agrega un fundeshi fuerte, sistema di riool, acera, klinker, e total pa cada proyecto ta bira hopi mas caro. Kiermen prijs ta subi y ta bira mas dificil. E unico manera pa yega na un calidad di cayanan cu acera, cu bahada y subida ta pa pone mas placa. Cual ta exactamente e reto grandi cu nan tin.

“Nos no por core mas for di e problema di e estado actual di nos cayanan, mester confronta e problema aki. Gobierno y Parlamento mester dicidi di hinca structuralmente placa den dje,” segun Herdé.

Tin hopi caminda na Aruba cu mester drecha no solamente e caya pero e acera tambe. Na momento cu e caya ta drecha pero e acera ta keda den mal estado, esaki no ta yuda mucho, e mandatario a enfatisa.

Minister Herdé a agrega cu su proposicion tabata pa bay bishita cada bario, haci un evaluacion, drecha caya, acera y cambia e lusnan, y lo sigui cu un otro bario. Pero esaki ta costa mas placa. “Nos kier haci hopi cu e presupuesto disponibel, nos kier haci'e bon, pero mas miho bo kier haci'e, ta menos bo por haci,” e minister a bisa.