‘Nan a priminti bo un miho bida pero Banco Central di Aruba ta confirma lo contrario’

Dangui Oduber

Segun encuesta 93% di consumidornan ta indica cu nan por cumpra menos cu 6 luna pasa 

ORANJESTAD (AAN): Cada dia cu pasa, ta bira mas evidente cu e coalicion di AVP-Futuro a faya den cumpli cu e promesanan cu nan a haci na e electorado di Aruba. Ambos partido a basa nan campaña electoral riba e compromiso di lo mehora e poder di compra, reduci e costo di bida, controla inflacion y percura pa un bahada general den e prijsnan di consumo na Aruba.

   Poder di compra ta sigui bay atras: Geoffrey Wever a priminti cu Futuro lo a yena e frishidernan bashi den apenas tres luna di gobernacion. Sinembargo, mas di un aña despues, e realidad ta totalmente otro. Awe nos pueblo ta wordo asota pa un inflacion structural, enfrentando un aumento drastico den e costo di bida debi na e maneho actual. E tarifa di coriente y awa NO a baha; e prijs di gas a subi como consecuencia di decisionnan di e propio minister; e prijs di gasolin y diesel ta na un nivel record; y e costo di comestibelnan ta mas halto cu nunca.

   No ta MEP ta bisa, ta Banco Central di Aruba (BCA) mes ta confirma den su mas reciente Encuesta di Confianza di Consumidor pa e prome kwartaal di 2026. E datonan ta alarmante: nada menos cu 93% di e consumidornan Arubano ta confirma cu nan por cumpra menos compara cu seis luna pasa. Famianan no tin placa pa gasta; e inflacion continuo y e aumento den gasto diario a debilita e poder di compra drasticamente.

   E pesimismo aki ta refleha den e Indice di Confianza di Consumidor, cual a baha cu 3,7 punto

pa cay te na 92,7. Segun BCA, tanto e percepcion riba e situacion economico actual como e expectativa pa e proximo lunanan a registra un deterioro serio, demostrando un falta total di confianza den nos economia.

   Temor cu costo di bida lo sigui subi: Un di e preocupacionnan principal cu a sali for di e encuesta ta e expectativa cu prijsnan lo sigui subi: 96% di e consumidornan ta spera un costo di bida mas halto den e proximo seis lunanan.

   Fuera di esaki, e capacidad pa spaar a cay drasticamente. E encuesta ta revela cu mas famia ta obliga di reduci of stop nan spaarmento; e porcentahe di esnan cu ta spaar menos a subi cu 14 punto, yegando un total di 46%. E cifranan aki ta confirma cu e inflacion y e costo di bida continuo ta sigui debilita confianza di e consumidor.

   Conclusion: E encuesta di Banco Central ta confirma un biaha mas loke nos a bin ta bisando: e situacion na Aruba no a bira miho, sino a empeora structuralmente bou di e Gobierno di AVP-Futuro. Poder di compra a bay atras, Aruba a bira mas caro y e nivel di pobreza ta sigui aumenta. Esaki ta keda reafirma pa Central Bureau voor de Statistiek(CBS), cual a indica cu e bestaansminimum pa un famia di cuater persona a bolbe subi, alcansando e cifra alarmante di 5,602 Florin.

   Mientras pueblo ta warda pa alivio ministernan ta fiesta, ta biaha y ta sigui derocha placa di pueblo. Minister Gerlien Croes so a biaha 14 biaha den 14 luna di trabao, un averahe di 1 biahe pa luna. 

   Unda cu bo bira tin un aumento explosivo di prijs: ningun prijs a baha, e costo di bida no a mehora y e poder di compra ta keda bay atras. Tur dia pueblo ta sinti efectonan di prijsnan na Aruba. Aruba merece miho, pueblo no a vota pa wordo castiga di e forma aki!